Namsan Khuapi Kan Laak Khawh Cang Tiah TNLA Nih An Fehter. Shan ramkulh chaklei Namsan khuapi cu nizan December 15 ah Ta’ang ralkap TNLA nih an laak khawh i fehter a sinak kong cu TNLA hruaitu pakhat nih People’s Spring ah a chim.TNLA nih Namsan khuapi kahdohnak cu a luancia December 10 in an rak thawk i zarh khat tluk a rauh hnu, December 15 ni ah khuapi a ningpi in an uk khawh cang.
![](http://teachexclusive.com/wp-content/uploads/2023/12/Screenshot_10-1.png)
Namsan khuapi kahdohnak ah a donghnak bik a taangmi SAC ralkap Byuha sakhan an laak khawh cangnak kong cu TNLA hruaitu pakhat nih cun a chim. Namsan khua tualchung mi pakhat zong nih, “Namsan khuapi cu TNLA nih an laak khawh i SAC ralkap nih vanlawng hmang in zan tiang pehtlai in kahdohnak an tuah,” tiah a chim ve.
A luancia December 10 ni ah Namsan peng Namkhe khua pawng Kadaiphu tlangpar sakhan cu TNLA nih an laak i a thaizing December 11 ni ah Namsan paliksakhan le Namsan Kaunghmusai ralkap sakhan zong an rak laak.Cu pin ah Namsan khuapi chung SAC nih biapi ngai ah an ruahmi Shwephi-U lakphak sehzung sakhan zong December 13, zanlei ah an rak laak i a dongnak bik a taangmi Namsan Byuha sakhan cu nihin December 15 ah an laak khawh.
SAC ralkap pawl nih Namsan sakhan an sungh lo nakhnga vanlawng le hriamngan hmang in voi tam ngai kadohnak an tuah nain TNLA nih an laak khawh ṭhiam hlei ah vanlawng kahdohnak ruang ah anmah SAC ralkap chung lila in thi le hliam an tam. TNLA nih an langhter ning ah; December 15 ni Namsan khuapi chung kahdohnak ah SAC ralkap nih ATR-42 vanlawng in voi 5, Jet Fighter in voi 15, Mi 35 in voi 10, Manton Khah-Lah-Yah sakhan in hriamngan voi 31 tiin kahdoh an bawmh hna ruang ah inn 30 leng a rawk, cu pin ah tualchung mi chung in minung 3 an nunnak a liam ve. TCP