Naite ah khan AA ralkap 100 hrawng cu Mara hmunhma ah an lut i CDF-Mara tuanvo ngeitu hna nih an chawnh hna tikah nanmah kah dingah kan ra lo, kan hmunhma zoh dingah kan ra an ti!
Malaysia Ram Ah Myanmar Ram Mi Telh In Ramdang Mi 263 Tlaih An Si, Chin Mi 30 Hrawng An I Tel. Malaysia ram, Kuala Lumpur khuapi ah Myanmar ram mi telh in phungning loin a um mi ramdang mi 263 tlaih an tong, tiah Myanmar mi bawmchantu phu(Malaysia) sin in theih a si. Kuala lumpur khuapi, Pudu bazar pawng Singapore Hotel le tualchung mi inn ah February 8 zan suimilam 7:00 hrawngah Malaysia palik le Immigration hna i bawm in chekhlatnak an tuah i minung 263 an tlaih hna.
Tlaih a tong mi minung 263 chung ah Myanmar ram mi 50 hrawng an i tel i zeitindah an tuah te hna lai ti cu hngalh a si rih lo, tiah Myanmar ram mi bawmchantu phu in ṭuanvo ngeitu pakhat nih a chim.Palik le Immigration nih an tlaih mi 263 chung ah pa 229 le nu 34 an si. Myanmar ram mi 50 chung ah Chin mi 30 hrawng an i tel tiin Malaysia um mi Chin mi pakhat sin in theih a si.Malaysia palik nih an chim ning ah Myanmar ram mi pawl cu lam kam ah kuva hang chak, rithaisii hman, hla thang piin chuah le au khuan an hman tuk caah pawngkam Malaysia ram mi hna nih report an pek hna i, tlaihkhih an tonnak hi a si, tiah Khumi hartong phu in Chairman nih a chim.
Hpakant Ralhrial Minung 30,000 Deng Nih Anmah Innlo An Panh Ṭhan Cang- Kachin ramkulh, Hpakant peng kahdohnak ruangah ralhrial in a zaam mi hna chung in minung 30,000 deng cu Hpakantmibawmchantu phu bawmhnak thawng in February 9 ah an innlo an panh kho cang, tiah theih a si.Ralhrial mi hna hi Hpakant khuapi Lonekhin le Saitaung phungki biakinn le khrihfa biakinn ah aa dor mi an si i February 9 zinglei ah an innlo an panh ṭhan cang hna, tiah mi bawmchantu phu in ṭuanvo ngeitu pakhat nih RFA ah a chim.
A ruang tampi ruang ah innlo a panh kho rih lo mi ralhrial mi cheukhat zong an um rih bantuk in Tarmakhan lei kap ah a zaam i innlo a panh kho rih lo mi zong an tampi, tiah a chim chap.A luancia January 6 lio zong ah Hpakant khuapi luhnak ah a um mi SAC ralkap sakhan pahnih cu KIA le ṭangṭi phu hna nih an rak kah i SAC ralkap nih vanlawng le hriamngan hmang in kahdohnak an tuah ve caah tualchung mi 30,000 deng cu Hpakant khuapi in an rak zaam. UNOCHA nih an langhter ning ah SAC nih nawlngeihnak an laak hnu in Myanmar ramchung ah ralhrial mi nuai 2.6 leng an phan cang. TCP