Buthidaung No.15 Operation Command Division Headquaters In SAC Ralkap 100 Leng AA Sin Ah An I Ap- Rakhine ramkulh, Buthidaung No.15 Operation Command Division Headquaters in, Colonel telh in SAC ralkap le an chungkhar minung 100 leng cu AA sin ah hriamnam chiah in an i ap kong AA nih nihin May 6 an thanh.
Buthidaung peng ah hrambunh mi No.15 Operation Command Headquaters telh in Battalion Headquaters 5, Maungdaw peng Headquaters 4 telh in SAC ralkap sakhan ngan mi 9 hrawng cu AA nih an laak kong nihin ah phungning tein an thanh.
Buthidaung No.5 Operation Command Division Headquaters cu AA nih caan saupi chung an kah hnu ah a luancia April thla donghlei ah ralkap thazaang chap in fak deuh in an kah hnu ah an laak khawh. Cu kahdohnak ah cun AA nih hriamnam le SAC ralkap hman mi thilri pawl an laak pin ah minung 100 leng an i ap, tiah theih a si. AA nih an laak mi Khah-Mah-Yah 551 le Buthidaung No.5 Operation Command Division Headquaters in i ap duh lo in a zaam mi SAC ralkap pawl cu dawi in Buthidaung peng, Tanshauk khua ah an kah ṭhan hna i an thi mi le hliampu mi an tam, tiah theih a si.
Thlichia Le Rial Nih Bungkhua IDPs Camp Inn 137 A Hrawh– A luancia May 2 ah Mizoram le Chinram ah hrang mi thlichia le rial nih khuakip ah inn tam ngai a hrawh i, Thantlang peng, Bungkhua IDPs ralzam inn 137 zong an rawk dih, tiah Bungkhua IDPs Seccretary Salai Van Co Kam nih The Chin Post ah a chim.
May 2 zan a hrang mi thlichia le ruah lak ah hin rial zong an i tel caah Chinram, Thantlang peng khua cheukhat ah inn cungcih a pem mi an tam, tiah theih a si. Bungkhua IDPs camp zong hi thlichia nih a hawh mi pinah rial nih a pemh mi an tam. Inn a rawk mi lak ah thlop awk ṭha lo tiang in a rawk mi tam ngai an um, tiah theih a si. Pehtlaihnak lei ah harnak a um ruangah tuan ah thawngpang kan hlat kho lo i, Bungkhua lei zong in thawng an kan thanh kho lo.
Ralzam bawmhnak an hmuh chun tein canpheo an cawk i ralzam inn a rawk mi hna cu sakremhnak an tuah. May 2 zan a rawk mi inn an remh cia mi inn 4 cu zahan zan(May 5) a hrang mi thlichia nih a hrawh chap. Ralzam inn a rawk mi hna hi a cungcih dihlak thlen cawk a si lo caah an ihnak cung zawn lawng an thlenpiak hna kong IDPs secretary nih cun a chimchap.
Kan hlat khawh tawk ah tutan thlichia ruangah inn a rawk mi hna cu Lungler khua ah inn 50 hrawng, Sihhmuh khua ah inn 30 hrawng, Ruakhua 52, Vanzang 23, Hmunlipi 7, Thau 10, Bungkhua IDP camp inn 137 an si i hi pinah khua dangdang a rawk mi kan hlat khawh lo mi an um lai, zumh a si. TCP