Chin Miphun Ralkap CNF/A Hruai Mi Ṭangṭi Phu Hna Nih ZRA-EC Sakhan 2 An Laak===Chin ramkulh, Tedim peng ah Chin miphun ralkap CNF/A hruai mi ṭangṭi phu hna le ZRA-EC kar ni 3 chung kahdohnak ah ZRA sakhan 2 kan laak khawh, tiah Chin miphun ralkap CNF/A in chim phuannak nawlngeitu Salai Htet Ni nih a chim. “Chinram chaklei khuapi pakhat chung ah um mi SAC ralhrang sakhan kahdoh ding in kan kal lio lam cenceo ah ZRA nih bomb hmanh in an kan kahdoh, cucaah mah hna hi kan kah hna ah a ṭha lai kan ti i an sakhan tiang kan va kah hna, kan kalnak lam i an um ruang ah kan kah ve hna hi a si i a ni 3nak kahdohnak ah an sakhan 2 cu kan laak” tiah Salai Htet Ni nih a chim.
Chinram chaklei um khuapi pakhat cu kahdoh ding in Chin miphun ralkap CNA hruai mi ṭangṭi phu hna nih timhlamhnak an ngeih lio 2024, May 1 ah Zomi Revolutionary Army- Eastern Command (ZRA-EC) nih bomb puahhnawh in an kahdoh hna i kap 2 kar kahdohnak aa thawk. Cu kahdohnak ah ZRA- EC sakhan hme mi pakhat (Elijah Camp) cu Chin miphun ralkap CNA le ṭangṭi phu hna nih an laak khawh, tiah theih a si.
Cu hnu ah kahdohnak pehtlai in a faak i nizan May 4 ah ZRA-EC thazaang 50 hrawng nih umhmun an khuarnak Carmel sakhan zong an laak chap, tiah theih a si.
Ni 3 chung kahdohnak ah CNA hruai mi ṭangṭi phu in pasalṭha 1 nunnak a liam i ZRA-EC in 3/4 hrawng an thih kong le kap 2 in hliam tuar mi an um kong zong theih a si. “Chin miphun mah le mah i kahdoh cu kan duh lo nain SAC ralhrang pawl hi Chinland in an thian khawh nakhnga kan kalpi lio ah mah bantuk in dawn/khamtu a um nakhna lo, nan i fonh lo ahcun hnahnawhnak nan kan pek nakhnga lo kan in nawl hna, mizapi he i fonh uh, kannih cu kan duh mi kan hmuh tiang kan kal lai” tiah CNF/A in chimnak nawlngeitu Salai Htet Ni nihcun a chim. Chinram chaklei, Tedim, Tonzaang, Cikha hmunram ah a cawlcang mi ZRA-EC nih a liamcia caan zong ah SAC ralhrang dohtu PDA, PDF-Zoland le CDF-Hualngoram sakhan pawl cu kahdoh in an hrawhpiak hna, tiah kan theih. LP