Pathian nih hmanmi si dingah I pumpek a herh maw timi kongah Rev.Dr. Tha Neih Fai nih achimmi cu ruah phu bak a si. A timi cu, Bawipa hmanmi si khawhnak dingah pum I pek herh lo. Bawipa nih a kawhlomi nih a rian an tuan kho lo. Amahbel Bawipa nih a auh cang mi a thim cangmi nih Bawipa caah pum an I pek a hau. Zeitintiah Bawipa auh cangmi nih Anawl an ngaihlo ahcun an mualpho. Jonah zong Bawipa bia a al ko nain a al kho thai lo. Cu caah Bawipa hmanmi si dingah minung lei kapin ipumpek a herh lo tiah a chim.
Tlaih A Tong Mi Mino 400 Leng Cu Yamethin Peng No.3 Basic Ralkap Sianginn Ah Training An Pek Hna– SAC nih February thla chung ah Myanmar ram hmunkip ah khual cazin chekhlatnak le ram mi sinak ID ngeih lo ruang ah an tlaih mi, mino 400 leng cu ralkap ah an tlakter hna i Mandalay ramṭhen, Yamethin peng raltuk cawnnak, no.3 Basic Training sianginn ah an kuat hna, tiah Naypyidaw lei thawng laaknak hrampi nih fehter in an chim.
March 2 ni ah Yamethin peng, raltuk cawnnak hmun no.3 Basic Training sianginn ah ke 12 ngei motor 20 in mino 400 leng an thiar hna, tiah tualchung mi nih an chim i, tlaih a tong mi mino hna cu February thla chung ah tlaih mi an si, tiah Naypyidaw lei thawng laaknak hrampi zong nih an fehter ve. Tlaih a tong mi mino pawl cu Yangon, Mandalay, Naypyidaw, Bago ramṭhen, Magway ramṭhen le Sagaing ramṭhen telh in khuapi dang mino an si i, a cheu cu khualtlawnnak lampi Check gate ah ram mi sinak ID an ngeih lo ruang tlaih tong mi an si.
Ramkhel kong he aa pehtlai mi hmanthlak an ngeih ruang le khual cazin pek lo chuankhan in tlaih a tong mi zong an i tel, tlaih a tong mi chung in tlangcung mi tam ngai zong an i tel ve, tiah theih a si. Tlaih a tong mi mino pawl cu a luancia February 10 i ram mi ralkap tlakternak upadi nunter a si hlan ah tlaih mi an rak si i February thla chung ah Myanmar ram hmunkip ah thilphur ding in tlaih a rak tong mi an si, tiah thawnglaknak hrampi nih an chim.TCP