Chin Hriamtlai Ṭangṭi Phu Nih Tonzaang Khuapi An Laak – Chinram, Tonzaang khuapi cu nihin May 21 zing ah Chin hriamtlai ṭangṭi phu nih an laak i SAC ralkap hman mi hriamnam 50 leng an laak kong CNF/CNA in chimnak nawlngei Salai Htet Ni nih a chim. “Nihin zinglei ah Tonzaang khuapi cu a ningpi in an laak cang, SAC ralkap nih an hman mi hriamnam 50 hrawng zong an laak khawh, SAC ralkap cheukhat cu an zaam i hmunram thianhfelnak an tuah lio, atu cu Tonzaang khuapi cu SAC ralkap an um ti lonak hmun a si cang,” tiah CNF/CNA in chimnak nawlngei Salai Htet Ni nih cun a chim.
A luancia May 19 ni ah Chinram, Tonzaang peng, Cikha khuapi um SAC ralkap sakhan vialte an laak dih hnu ah khuapi a ningpi in CNA le CDF ṭangṭi phu nih an rak laak, nihin May 21 zinglei ah Tonzaang khuapi an laak ṭhan i Tonzaang peng a ningpi in Chin hriamtlai ṭangṭi phu nih an laak dih cang. A luancia May 15 ni ah thawk mi Tonzaang khuapi kahdohnak ah SAC ralkap thi le hliampu mi an tam i tlaih mi zong an um, cu kahdohnak ah cun SAC ralkap nih vanlawng in kahdohnak an tuah i bomb an thlak caah tualchung mi zong a himnak hmun kawl in ral an zaam, tiah theih a si.
Nizan May 20, zanlei suimilam 5:30 hrawng ah khan CNA le CDF ṭangṭi phu nih Thantlang SAC ralkap sakhan cu hriamngan le tanglei in meithal he an kah hna, cu kahdohnak ah cun CDF-Thantlang in ralkap pakhat hliam fak tuk lo a tuar, SAC ralkap lei in thi le hliam an um le um lo kong fiang in theih a si rih lo kong CDF-Thantlang GS Salai Khamh Pek Lian nih The Chin Post ah a chim.