Ral Teinak Lawmhnak= 2024 May 21 ni cu zingka ka thawhhlan in ka phone a ring i ka vun zoh cu Tonzang Myo hlum Ralhrang Camp cu Chinland ralkap hna nih an lakkhawh dih cang ee ti a si… Ka tho colh i Pathian sin thla ka cam, Lunglawmhnak ka chim. Teinak thawngṭha ka theih lio ah a kan liamtak cangmi kan fapa Vanvan, ralhrang tei a duh tukmi ka mitthlam le ka thinlung ah an hung thar ṭhan ….
Ramleng sianginn kainak (Further Study) kong an rak i ceih lio ah Vanvan nih “kei cu ralhrang kan tei dih hlan lo khoika hmanh ka kalkho lo ee tiah a rak ti….” Maw ka fapa aw nihin cu Chinram Myo pakua lakah ralhrang hmunkhuarnak pakhat a simi Tonzang ralhrang camp cu lak a si cang, na rauthla in rak i lawm ve law tiah zing lam ka len i thlanhmun chak ka phanh lio ah aw thangpi in ka au ee ….
Tulio raltuknak ah kan bochan bikmi le hmual a ngeibikmi hriamnam cu “Drone” a si. Russia le China sermi Jet Fighter cu misual ralhrang phu hna nih hmang len hna hmanh seh, Pathian a zum i aa bochanmi Chinland Ralkap hna nih hmanmi “Drone” tu hmual a ngei deuh, Pathian khuaruahhar ṭhawnnak thawngin a si … Bawipa A min thangṭhat siko seh… Halleluijah!!!
Ngeihchun nunnak pakhat te thap in ram caah ral a dotu kan ralkap dihlak (CNA, CDF+, PDA, SRF, PDF+) cungah kan i lawm, upatnak kan in pek hna. Hliamtuarmi ram dawtu kan ralkap hna nan caah thla kan cam, Pathian nih damtuannak in pe ko hna seh. Ram dawtu pasalṭha Martyr hna upatnak sangbik kan in pek hna “Salute!” … Lungdai tein Vancung khua Pathian sin ah rak i din cang ko uh … Nan rian hmaban a dongh tiang kan run pehzulh lai.