Chinland Council Le Phunghram. A voikhatnak Chinland Council tonpumhnak ah December 4-7, 2023 tiang Victoria Base, Chinland ah tlamtling tein an tuah i CNF/A, Chin hlutdaw palai hna, peng le tlang aiawhtu hna le ramchung ramleng in sawm mi palai hna, an dihlak minung 235 an i tel kho. December 6, 2023, zinglei 11:33am ah Chinland Constitution an fehter i cu ni ṭhiamṭhiam zanlei 1:27pm ah Chinland Council zong an ser, an fehter khawh. CC an ferhter ni thawk in ni 60 chung ah Chinland Hlutdaw, Chinland Cozah le Chinland Biaceihnak (supreme court) hna cu an ser lai. CC hruaitu hna cu-
- Pu Zing Cung (Chairman), CNF/A
- Pu Min Nyo (Vice Chairman-1), Kanpetlet MP
- Pu Bawi Kung (VC-2), CDF-Mara
- Salai Paul (General Secretary), CDF-Paletwa
- Pu Htet Ni (Joint GS-1), CNF/A
- Pu Ṭial Ling (Joint GS-2), Hakha MP
Hi hna hi CC lutlai cu an si i CC chungtel dihlak 112 an si. CNF/A in 27, SAC a doh mi Chin MP in 17, CDF le pengtlang palai 68 hna an si. Chinland Phunghram Dal 3nak, caang 26 nak ning ah cun MP 27, CNF in 27, peng le tlangthluan palai 86, an dihlak chungtel 140 in Chinland Council hi ser ding a si. Asinain a cunglei bantuk khin an ser phot rih i a herhning in an kauh te lai.
Chinland Phunghram cu dal 10 a si i caang 106 a um. Dal 1nak ah phunghram hna, dal 2nak ah Chinland serning tungtlang, dal 3nak ah Chinland Council, dal 4nak ah phunghram sernak, dal 5nak ah ukhruainak, dal 6nak ah biaceihnak, dal 7nak ah runvennak le humhimnak, dal 8nak ah pengtlang ukhruainak, dal 9nak ah thimnak le dal 10nak ah phunghram dangdang hna an si. Chinland Council siseh, Chinland Phunghram siseh, ni 60 chung i an ser ding mi Chinland Cozah siseh dohthlennak caan chung ca lawng an si. TCP
Chinland Council Hruaitu Thlacampiaknak Caanhmannak- Chinland Council Hruaitu Thlacampiaknak Caanhmannak cu 2023 December 7 ni (MMT. 3:00 pm), Revolution Hall, Victoria Base ah tlaamtling tein kan tuahkhawh. Thlacamnak a dih hnu ah CC Hruaitu donnak zaanriah eiṭinak (Sia sa)kan ngei… Zaan ah “Siallum Band” nih hlasaknak le nunphung laam a phunphun in Chinland Council & CC Hruaitu lawmhpinak caanhmannak an kan ngeihpiak… Lamhruaitu Pathian A min kan thangṭhat! Ngaihchiatnak lawngte deuh ah caan ka hmang tawn nain 2023 December 7 zaan cu lunglawmhnak lakah lunglawmhnak taktak ” Chinland Hruaitu” thlacamh caanhmannak ka hmangkho ii kaa lunghmuihtuk … Minung tuanbia khupthap a lettu cu Pathian a si. TH