ICNCC Cu Mizei Phu Hmanh Nih Hrawhnak Nawl An Ngei Lo Tiah ICNCC Nih Cathanh Chuah- Chinland Council cu CNF/A hruainak in December 6 ah CNF/A, Chin hluttaw palai hna, peng le tlang aiawhtu hna le ramchung ramleng in sawm mi palai hna, an dihlak minung 235 nih an dirh hnu in Interim Chin National Consultative Council(ICNCC) nih lehnak bantuk in cathanh an chuah colh ve. ICNCC nih cun, ICNCC cu Chin ramkulh aiawh ramkulh ruahnak petu Council a si bantukin a dir peng ding le mizei phu hmanh nih hrawhnak nawl an ngeih lonak kong an langhter.
Caan karlak Chin miphun ruahnak petu Council (ICNCC) cu 2020 thimnak ah teinak rak hmumi Hluttaw palai hna, CNF/A le Chin ramkulh NLD hna, phu 3 nih 2021 April 13 ni ah rak dirhmi a si bantukin Chin ramkulh aiawh ramkulh ruahnak petu Council pakhat sinak dirhmun in a dir peng lainak kong nizan December 7 ah an thanh. ICNCC nih aa khinhmi ṭuanvo kong ah minung pumpak in siseh, Council dang si hna seh, mizei phu hmanh nih hrawhnak nawl an ngei hrimhrim lo i pumpak siseh, Council si hna seh, mizei phu sin hmanh ah ṭhial le ṭuanvo pek an si lai lo, tiah ICNCC nih an cathanh ah cun an langhter.
CNF/A hruainak in a voi khatnak Chinland Council tonpumhnak cu a luancia December 4-7 tiang an tuah i, December 6 ah Chinland Council tlamtling tein an dirh khawh. Chinland Hluttaw palai, Chinland cozah phu le Chinland biaceihnak (Supreme Court) cu ni 60 chung ah dirh ding in biachah a si hnu ah atu bantukin ICNCC nih cathanh an chuah ve.