Min Aung Hlaing nih hramhram uknak a lak cu Chin miphun pengtlang lungput cu thuhnawh kholo in kan tial tete a hunglang dih ko cang. Pupa nih an rak chim tonmi bang, ‘Cakei nih a Tial hloh kho hlah’ timi le ‘Cangai lam kal’ timi kha a si cang.
Hriam meithal vun i put cio tikah thinlung ruahnak aa dang lulh cang. Kan ral hi zeitindah kan tei lai timi nakin kan ram that tikah zeitindah pengtlang hi mah tein kan i uk khawh lai timi nih thinlung ah hmunhma a lak deuh cang. Nihin pengtlang kip hriamtlai nih ram that tikah kanmah hi pengtlang ralkap kan si lai timi hruaitu upa lungput ruahnak thalo nih hmunhma a lak dih cang.
Cutikah Kum 35 Chin miphun caah nunnak pekin riangtuanmi CNA cu lamh chihnak lungput, zeihlei an si lo kanmah bantuk an si ve ko ti ruahnak nih upatnak thinlung vialte a hloh dih cang. Cu ruangah nihin ah Chinram hriamtlai cu mah duhnak lam zulh cio a si. Kan pupa phungthluk ah “Zabui lamthlang ril”, “Vorvok zunhli tla” timi caan kan phan cang.
Asi lemlo zongah Council 2 ti phawt ko tuah u sih, Chinland Council le Rakhine AA council tiin mu. CNF, CDFs le MPs nih CC an dirh tikah CNF a rem lomi peng hriamtlai an pial, cubantuk nih cun heh tiah dirty politics a tuah i a tu cu phu an dirh ve. CNDF, MDF, ZFU le cheukhat CDFs Matu, Mindat le Kanpelet nih AA tangah lutin SAC kan doh lai an ti. Miphun ralkap CNA khuakhannak tangah um an duhlo. An duhlonak a ruang pakhat a si khomi cu, CNA tangah kan um ahcun ram a that tikah hriam an kan chiahter dih lai i mah pengtlang ah kanmah tein uk hruainak a kan pe lai lo, AA kan fuh ahcun kanmah tein i uk khawhnak dingah CNA a kan doh pi lai tiphun a si lai dah.