Chin miphun ni cu Chin miphun kan luatnak hmelchunnak ni a si bantukin sal ah ser a kan timtu Ralhrang nih Rungtlang ah tuah an timh mi cu kan duh lo. Cucaah Chin miphun a dawtu ahohmanh i tel lo ding le a telmi cu poipang nan ton sual ahcun nanmah palh a si lai!
SAC Ralkap Nih Mongmit Khua Mi 102 An Thah Hna, Nu 4 Cu An Thah Hna Hlan Ah An Tlaihhrem Hna! Shan ramkulh chaklei, Mongmit khuapi ah SAC ralkap nih kahdohnak an tuah lioah tualchung mi 102 an thah hna i kum tling lo nu ngakchia 3 telh in nu 4 zong an tlaihhrem hna hnu ah an thah hna, tiah Mongmit khua mi hna nih Khit Thit Media ah an chim.February 18 ah KIA le PDF nih Mongmit khuapi cu an kah i khuapi chung hmun cheukhat an laak hnu ah tualchung mi 102 an thah hna i kum 13 tluk nu ngakchia telh in nu 4 zong an tlaihhrem hna hnu ah an thah hna, tiah a chim chap.
Division 99 SAC ralkap pawl cu Mongmit khuapi an luh lio ah Ywatawlay khua mi pafa hna cu an tlaih hna i a pa an thah hnu ah a fanu kum 13 tluk cu an tlaihhrem i an thah ve. Shwezalri le Ungkyaw khua karah nuva hna zong an tlaih hna i a vapa an thah hnu ah a nupi cu an tlaihhrem ṭhan i an thah ve. Shwezali khu mi kum 15 le 17 tluk nu 2 zong an tlaihhrem hna i an thah ṭhan hna, tiah theih a si.
Cu pin ah Mongmit khuapi in meng 7 aa hlatnak arzuatnak dum ah SAC ralkap nih kum 64 pa pakhat cu an tlaih i a kut hri in an ṭem hnu ah mei in an khangh, cu thil an tuah mi cu PDF tuah ser mi bantuk in an langhter, Khit Thit Media nih a ṭial. TCP