CDF-Mara le MDF karlak ton biaruahnak ngei dingin lungtlinnak an tuah cang. Tonnak ding hi hmun hnih sawh a si, MDF nih Mizoram Siaha khuapi ah siseh an ti, CDF nih kanmah ramchung Lailenpi ah siseh an ti ve. Atu cu tonnak hmunhma zong tha tein fehter asi I, Siaha cu ramdang a si caah zeikhom siseh kanmah ram a si mi Lailenpi ah si ko seh ti cu lungtlinnak an ngei.
Mah ton biaruahnak hi Mara Evangelical Church (ECM) tawlrelnak in asi lai tiah TCP nih achim. ECM hi Mara ramchung ah biaknak nganbik an si. Tlam atlin khawhnak hnga, remnak a um khawhnak hnga, hmunkhat te ah miphun caah riantuanti khomi an si khawhnak hnga thlacamnak in bawm cio hram hna u sih.
Bhamo Khuapi Um SAC Ralkap Hriamngan Kahnak In Ngakchia Pathum Telh In Tualchung Mi 5 Nunnak A Liam– Kachin ramkulh, Bhamo khuapi um Sah-Kah-Khah 21 SAC ralkap nih an kah mi hriamngan cu Kanni khua telh in khua 4 ah a tla i a puah caah kum 10 tang ngakchia 3 telh in tualchung mi 5 nunnak a liam, tiah Bhamo khuapi um tualchung mi nih an chim. Bhamo khuapi Sah-Kah-Khah 21 Byuha sakhan um SAC ralkap nih Bhamo khuapi kiangkap ah dongcat lo in hriamngan an kah mi cu Moeseinkyun, Mongkar, Kanni le Hsintkin khua ah a tla i khua 4 in tualchung mi ngakchia pathum le nu pahnih an nunnak a liam, tiah Bhamo khuapi um tualchung mi pakhat nih a chim.
A luancia March 7 ni thawk in Myitkyina–Bhamo khuapi lampi cung SAC ralkap sakhan cu KIA nih an laak khawh hna caah SAC ralkap pawl cu Bhamo khuapi chung ah lut in “KPDF khuachung ah nan ṭanpi hna” tiin sualnak ngei lo tualchung mi an tlaih hna i i, nai hrawng ah thah a tong mi 10 hrawng an si cang, tiah Bhamo khua mi nih an chim. “Thah a tong mi hna hi mizei dah an si ti hlat an sianh hna lo i mi bawmchantu phu lei zong hmanthlak tibantuk an sianh hna lo, ruak an laakter hna i an khanghter colh hna,” tiah Bhamo khua mi pakhat nih a chim.