Kan nih cu kah bak a si ko, Hakha khuachung zongah rak kan kap hna hlah seh, an kan kap ahcun mipi nih nan tuar lai tiah an timi kha I zumh a si lo. Ral cu kan kah hna awk a si, Hakha khuami ummi zong nih kap hna hlah seh ti lungput rak ngei hlah uh, kap hna seh timi lungput tu rak ngei deuh uh. Cun ralhrang hi kan ral bak an si bantuk in techin fapar chan tiang kan ral an si ti hi philh hlah uh law kanmah tu hi thawngpang rak kan pe deuh uh.
Cun a tu zong ralhrang he aa uar mi nungak tete kanin theih dih ko hna, an check gate hrawng ah va kal I duhpoh in uico palek pawl nih tuaitammi zong kan in theih dih ko hna. MAH ZONG I ZUAR, MIPHUN ZONG ZUAR, I RALRING UH a can aphanh tikah nan theih te ko lai. Cu caah I ralring cikcek uh. Nihin tiangah kan in zoh sawhsawh rih hnami hna aruang cu, Laimi cu kanmah le mah ipehtlaihnak a tha, kan I daw hna I nihin tiang Mah zong I zuar Miphun zong a zuarmi hna kha zeitihmanh in kanin ti rih hna lo. Non-CDM pawl zong kanin theih dih ko hna, khuika dah nan kal i nan um timi vialte kanin theih dih hna. Cucu caantha lak phun in ralhrang he ipehtlaiin heh tiah rian nan tuan, phaisa nan kawl, ningcang loin innhmun kan sawksam, tender nan tuan, kha bantuk vialte kha cansau a nguh lai lo.
Cun Tedim le Falam leiin arami non-CDM pawl nan ra I dohthlennak ruangah rian kan chuahtakmi vialte cu nan nunter hna. Ram Zu nih Inn Zu aponchuah tibantuk in, miphun dawt ruangah Hakha/Thantlang peng le tefa vialte nih CDM an tuah I rian an chuahtakmi hmunhma cu nan rawlh dih. Nihin ah nan umnak nan tuanmi hi zeidah a si kanin theih dih hna. Arannak in chuak u law zam dih uh, cucu kanin zaangfah hna caah kanin chimh hna. Kanmah Inn-teek a simi cu khuazeihmanh ah zam hlah uh, kan thih ah kan nun ah kanmah le inn le khua te ah kan thi lai khua kan sa hna lai.
Ralhrang kuttangah Khualipi si hi kan duhmi a si lo, khualipi a silo zongah a poi lo, ralhrang uknak tangah khualipi sinak cha cun, ralhrang nih uk lomi aluatmi khuate si hi kan duh deuh. Hakha cu Pathian thimmi chiti thuhmi asi caah khualipi cu a si thiam ko lai. Cu caah a herh cun Hakha khualipi zong kan kah ko lai, kan ral hi kan tei hrimhrim a hau. Zam a herh kan ti ahcun kanmah nih thawng kan in thanh te ko hna lai. Zam zong I tim hlah uh, kan khua kan inn le lo zamtak chuahtak ding kan si lo tiah a chim.