Feb.17 ah MDF tapung nih AA tapung I sawm in CNA le CDF-Mara cu ambush an rak tuah hna ruangah kahdohnak a chuak. CNA pasaltha 1 nunnak a liam i minung 4 hliam an tuar tiah theih a si. MDF le AA leiah minung 8 an thi i 14 hrawng hliam an tuar. Ambush tuahtu AA le MDF cu an zam than tiah Col.Solomon nih a chim. Athimi hi AA tapung deuh si dawh an si.
MDF nih CNA le CDF-Mara an rak kah hna ruangah CNA 1, CDF 1 nunnak a rak liam. CNA athimi ruak hna cu ningcang loin an rak chap rih. An tuahsernak hi ngaihthiam khawh awk an tha ti lo kan ti caah kan kal hnawh hna i an sakhan zong kan hrawh piak dihmi hna si. MDF cawlcanghnak hi ralhrang bantuk an si i MDF control tu hi ramleng um upa an si hna i mah hna pawl vialte zong kha dawi dih an hau. Ramchung zongah kan dawi dih hna lai tiah a chim chap.
Paletwa Peng Ah Chin Hriamtlai Phu Hna Karlak Ah Kahdohnak A Chuak I CNA 1 A Nunnak A Liam — Chin ramkulh, Paletwa peng, Mara hmunhma, Pa-ṭhing-ṭa-lan khua ah Chin hriamtlai phu hna karlak ah kahdohnak a chuak i CNA ralkap 1 a thi, 4 an i hliam tiah theih a si.
Mara hmunhma, Pa-ṭhing-ṭa-lan khua le Paih-ṭe khua pawng, February 17 zaanlei sml 2:00pm hrawng ah CNA, CDF-Mara phufonh hna le MDF karlak ah sml 1 hrawng kahdohnak a chuak tiah Zalen nih a langhter.”CNA le CDF-Mara pawl kan kalnak lam ah MDF nih an kan bawh i an kan kah. Sml 1 hrawng kahdohnak a rau. CNA ralkap 1 a nunnak a liam. Minung 4 hliam an tuar. MDF lei a thi/hliam zat kan thei rih lo” tiah CDF-Mara ṭuanvo ngeitu Salai James nih Zalen ah a chim.
A luancia January 30 ah Myanmar-India ramri um, MDF sakhaan pakhat cu CNA telh in CDF (Mara, Paletwa, Thantlang, Zophei, Lautu) hna nih thazang tampi in an kah hna tiah MDF nih February 2 ah thawng a thanh. Paletwa, Lailenpi, Thantlang peng Mara hmunhma ah Chin hriamtlai phu hna karlak ah entainak a fak i mipi umkal mi zong an chek hna tiah khuami hna chum mi cherhchan in Zalen nih a langhter. TCLP