Kalay Peng Tualchung Mi 3 Nunnak Liam, Minung 9 Hliam An Pu- Nihin February 21 ah Kalay peng hmunkip ah kahdohnak a chuak i SAC ralkap nih hriamngan pehtlai in an kah ruang ah Kalaymyo, Hmunlai sang tualchung mi 3 an nunnak a liam i minung 4 hliam an pu. Kalaymyo chaklei Letpanchaung khua mi nu pahnih, pa pahnih le Pyidawthar khua in ngakchia pakhat hliam an pu ve, tiah theih a si.
Kalaymyo, Hmunlai sang in a thi mi tualchung mi 3 le hliamtuar mi 4 pinah Kalaymyo chaklei ah kum 13 ngakchia pakhat, kum 30 nu pakhat, kum 19 nu pakhat, kum 73 tarnu pakhat le kum 62 nu pakhat hliam an pu, tiah theih a si. Nihin February 21, ni khat chung lawng ah SAC ralkap nih hriamngan voi 40 leng an kah, tuzan tiang zong ah pehzulh in an kah rih i Kalaymyo khuachung zong ah SAC ralkap nih ralkap thazaang an chap, tiah theih a si.
Thantlang Peng Ruabuk Khua Pawng Ah Motor Pakhat Lam Thlang Ah A Liam- Chinram, Thantlang peng, Zahnak tlang, Ruabuk khua pawng ah nizan February 20 ah khan motor pakhat lam tlang ah a liam i a rawk dih, tiah theih a si. Nizan February 20, zanlei suimilam 6:00 hrawng ah Ruabuk khua he meng khat tluk a hlatnak ah thing a phur mi Pik-up motor pakhat cu lam thlang ah a liam i motor cu a rawk ngai, tiah theih a si.
Ruabuk khua pawng motor accident kong he pehtlai in tualchung mi pakhat nih cun, “Nizan February 20 zanlei suimilam 6:00 hrawng ah a cangsual mi a si. Motor ngeitu pakhat le a hawi pa cu zanlei sang hnu ah thing phur ding in an kal i an tlun pah cho lai an kai lio ah motor seh ciankuan lo ruang ah atu bantukin vanchiat an ton hi a si,” tiah The Chin Post ah a chim.
“Vanchiat a tong mi Ruabuk khua mi pahnih lak ah pakhat cu hliam a pu lo nain motor ngeitu pa belte hliam fak tuk lem lo a pu i siibawi te nih an thlopbul cuahmah lio a si, an motor tu cu lampi he pe 200 leng a hlatnak lam thlang ah a liam i laak awk a ṭha ti lai lo,” tiah tualchung mi pakhat nih cun a chim. TCP