ICNCC Zul Ding In CNO, CNC – Mindat Le ZFU Ceihruahnak An Ngei. Interim Chin National Consultative Council(ICNCC) lamthluan ning in Chinram ramkhel kalpi ding ah CNC-Mindat/CDF- Mindat, CNO/CNDF le ZFU/PDF-Zoland cu tonbiaruahnak le ceihkhannak an ngeihnak kong CNDF Vice Chairman 1 Salai Peter Thang nih a chim.
CNC – Mindat, CDF – Mindat, CNO/CNDF le ZFU cu December 15 le 16 ah Chin ram hmun pakhat ah CJDC chungtel hna he tonnak an ngei i CJDC an hrawh hnu ah December 17 ah raltuk le ramkhel kong rianṭuanṭi dingah tonnak an ngei ṭhan, tiah theih a si. Chinland Council dirhmi cu Chin miphun le rampi a huap lo caah an cohlan lonak le a hlan tein a rak um cangmi ICNCC cu zul in Chin ramkhel pi zong kalpi i fumtomnak ser ding in Salai Peter nih cun a chim.
ICNCC cu Legitimacy zong a tling i strike committee, CDMer, MP hna le hriamtlai phu nih rak dirhmi a si. Cu leng ah caan karlak Chin rampi sernak dingah tel awk tlak minung hna zong an i tel ve a hau i ICNCC lamthluan ning in kal cu a tlamtlin biknak kong zong a chim chap. December 4-7 tiang Chinland Council Conference cu Victoria Base ah rak tuah a si i Chinland Constitution zong fehternak rak ngeih a si. Asinain CNC – Mindat/CDF – Mindat, CNO/CNDF le ZFU/PDF-Zoland hna cu a voikhatnak Chinland Council Conference hi Democracy he aa tlak lo an ti caah an rak kai lo.
Mandalay Palace Chung Um Mandalay Ramṭhen Uktu Le Uktu Chang Umnak Cu PDF Nih Hriamngan In An Kah. Mandalay khuapi, Aungmaytharsan peng, Mandalay Palace chung ah hram a bunhmi Central Command Headquarter cu nihin December 21 zinglei ah hriamngan in an kahnak kong PDF le Palace pawng ummi hna nih an chim. Cu kahdohnak ah cun Brave Warriors For Myanmar (BWM) in ṭuanvo ngeitu pakhat nih, Mandalay Palace chung ah a ummi Central Command Headquarter uktu le a changtu umnak zong ṭha te i tinh in hriamngan 107mm lung 6 in an kahnak le lung 5 cu tlamtling tein a puahnak kong RFA ah a chim.
Kahdohnak ah a thimi le aa hliammi an um le um lo hngalh a si lo i Mandalay Palace kah hnu ah SAC ralkap pawl cu khuachung ah chekhlatnak an tuah, tiah theih a si. Mandalay Palace kahdohnak ah Mandalay Security and Special Task Force (MDY-SSTF), Pyin Oo Lwin pengkomh Pah Kah Phah, No More Dictatorship NMD-PDF le Brave Warriors for Myanmar (BWM) hna i bawm in an kah, tiah theih a si. December 20 zong ah Shwepyisoe operation min in Mandalay Palace, Obo thonginn laifang telh in Mandalay khuapi um palik sakhan cheukhat cu Mandalay PDF nih drone in an rak kah cang.