Miphundang nih hramhram in hriamtlaih in kan ram an uk asi ahcun kan zoh sawhsawh hna lai lo tiah Col. Pu Solomon Thangding nih a chim. Hi hi tulio AA nih Peletwah ramchung ah ralhrang an doh i SAC sakhan an lak thluahmah cang caah Pelewah cu AA kutah a um cang timi kongah biahalnak le lehnak a tuah mi asi.
Mang Hram Kung- Paletwa cu AA nih an i hum cang. General Aung San a min a than biknak cu Panglong Agreement hmang in Kawl tthithruai mi ram nganpi a ser khawhmi hi a si.Arakan tuanbia ah General TMN a min a thanter biktu lakah 80% Chinmi umnak hmun Chin hriamtlai bu 20 leng um lioah hnahnawh tu ngei loin Kawl kut in amah zal chung ah a tlakter khawhmi hi a si te lai.Chinmi kan i tthithruai ning rak tluang sehlaw Paletwa hi a ning taktak in Rakhine kut phak lo khawh a si. A zatceo tal cu Chinmi nih i hum khawh mi ah a tla men hnga.
Paletwa an laak dih in a hun zul dingmi cu AA nih amah he ai dawcia mi Mindat Matupi le Kanpalet hrawng ah Paletwa himnak dingah a thazaang a chap te men lai. Mindat maw, Myo pakhatkhat zong a laakpiak te khawh mi hna a si— an tha pawtter duh ah.Khumi le Chin tiin Paletwa minung a tthen hna lai. Khumi cu Chin nan si lo timi duhsah tein media le nawlngeihnak phunphun hmang in an kheih hna lai. Khumi le Chin an tthen khawh hna ahcun Mara le Daai ti bantuk lawng Chin an si te lai. Rakhine ram Khami le Paletwa Khumi van fonh i Rakhine miphun fa pakhat ah ser, Chin cu mi tlawm-u ah canter i i hùm thai ding kha an tuah zungzal mi an peh rih ding a si ko. Nawlngeihnak an kut i a um bu in tuahmi a si lai caah kum 10 kum 20 a rauh ahcun an hlawh a tling te kho.
TMN i Kum Thar zing a bia ngaih ah “AA Headquarters” Kachin ram i a um rihmi a chim. 2024 chung ah Headquarters tthial khawh a si. Paletwa le Rakhine ramri hrawng ah a tthial te ttheu lai. Paletwa zong ah maw an headquarters an chiah te.Paletwa humhak ding ah AA caah Mindat Kanpalet an biapi chin lengmang. Paletwa ah duhning in zalong tein um khawh nakding ah a ral a si kho tiah a ruahmi CNA/F runven nak ding ah CNA/F a ralenhtu phu caah caanttha a ser te lai. Cu nih thil tampi a thlen te khawh. Vanchiat ahcun mah le mah kar i kah nak zong maw a phak te.
2024 chungah AA le CNF/A kar ah ttukttak tete a chuak te kho. Atu hnu cun Chin a si ttung I AA nih duhtawk in Paletwa a tlaihhrem khawhnak ah a bawmtu cu Chinmi caah “leirawi tu” ti an i huah cang lai.
Khat leiin Kawl, khat leiin Rakhine an si lai caah 2024 hi Chinmi ramkhel lamthluan ah a buai cem kum zong maw a si te.