1. Hakha khuapi chungah vawlei hmun kkong he pehtlaiin Feb.1, 2021 hnu ah ralhrang kuttang I zung riantuan hna nih ningcang loin E-kah 676 chungah vawlei hmun an zuar mi tampi kan hmuh. Hakha chung hmundang tampi zongah vawlei hmun aa ham mi le vawlei hmun a kulh mi tampi nan um rih. Cucaah E-kah 676 chung siseh, hmundang I vawlei hmun aa kulh mi hna siseh, inn sak rih lo ding, hmun kulh mi vialte hrawh than dih ding.
2. Hakha ramchungah Hakha City Council nawlngeitu hna theih pinak tel loin a hohmanh thingah lo ding. 3.Dohthlennak a dih hnu Ukhruaitu thar nih zohfelnak a tuah hlan tiang a cunglei langhter mi nawlchuahnak a zul lomi cu Hakha City Council nih kan phung ningin dantat nan si lai
SAC Nih Hakha Khuachung Ah MPT Phone Line Suimilam 18 Chung An Phih. SAC nih phone line an phih caah Chinram, khualipi Hakha khuachung ah MPT phone le internet line cu nizan zanlei in nihin chun 12:30 tiang a pit, tiah theih a si. Nizan January 8 zanlei suimilam 6:00 hrawng in MPT phone le internet line cu SAC nih an phih. Internet line zong hman khawh a si lo pinah phone zong in i chawnh khawh a si lo, tiah tualchung mi pakhat nih The Chin Post ah a chim.
Nizan zanlei suimilam 6:00 hrawng in MPT line a pit i nihin January 9 chun suimilam 12:30 hrawng lawng ah a ngah ṭhan. Voidang zong ah MPT line hi a pit tawn i ni khat le zan khat tluk a rauh hnu ah a ṭha ṭhan tawn, tiah a chim chap. Chinram khuapi Hakha ah MTP le Ooredoo line lawng a ṭha i Telenor phone le internet line a ṭhat ti lonak hi thla khat le cheu tluk hrawng a si cang. Wifi Telenor a hmangmi hna cu Telenor line a rawh caah a hlan bantukin duh tawk in an hmang kho lo, tiah a dang tualchung mi pakhat nih a chim ve.
SAC Ralkap Raltuk Cawnnak Le Sianghleirun A Umnak Pwin Oo Lwin Peng Tiang TNLA Le PDF Nih Kahdohnak An Tuah Cang. SAC ralkap siangleirun a umnak Mandalay Ramṭhen chung, Pyin Oo Lwin peng Kyaukmelay khua ah SAC ralkap le TNLA kar kahdohnak a chuak i kahdohnak a zual ngai, tiah theih a si. Kyaukmelay khua ah TNLA le PDF i bawm in SAC ralkap hna cu January 6 thawk in an i kap cang. TNLA lei nih cun, Kyaukmelay khua cu Shan ramkulh Naungcho peng ah a ummi a si an ti.
Kyaukmelay khua ah hin January 7 le 8 ah kahdohnak a zual ngai i SAC ralkap lei nih an thazaang a der ngai caah zan suimilam 6:00 hnu in leng chuah lo ding in nawl an chuah. Cu pinah Fighter le Helicopter hna zong an hman, tiah TNLA nih an langhter. TNLA le ṭangṭi phu nih Shan ramkulh Naungcho peng, Thanbo khua SAC ralkap sakhan cu January 2 ah an rak kah i January 3 ah an laak khawh. Sakhan ukhruaitu Deputy Colonel Thet Aung zong an rak tlaih.
January 7 ah Kyaukmelay khua cu SAC ralkap Mi 35 nih voi 5, Fighter in voi 6 a kah i inn 3 zong an kaang. Shan ramkulh chaklei le Mandalay ramṭhen ah a ummi SAC ralkap sianghleirun a umnak Pyin Oo Lwin cu tlangcung hriamtlai phu le PDF kut i a um lonak ding ah SAC nih ralkap thazaang a thong in an chap, tiah theih a si. Chaklei hriaktlai ṭangṭi phu thum nih Shan ramkulh chaklei ah a ummi SAC ralkap sakhan le khuapi tampi an laak i Lashio, Muse, Mongmit le Khaukme khua hna lawng an taang cang.TCP