KHAMHNAK A CO CANGMI HI KAN TLAU TTHAN KHO TI MAW?
1. KHAMHMI HI TLAU TTHAN KHO USIH LAW, PATHIAN INCHUNGKHAR MEMBER IN LUH/CHUAH LENGMANG NA HAU HNGA-Khrih khamhnak kan co cang ahcun Pathian inchungkhar ah member kan si (Johan 1: 12). Sualnak kan tuah caan poh i kan khamhnak a tlau i kan i zuam caan poh i khamhnak kan hmuh asi ahcun Pathian inchungkhar chung in hlawnh lengmang, luh tthan lengmang kan hau hnga. Kum khat ah voi 1000 hrawng Pathian inchungkhar ah member na si hnga i voi 1000 hrawng member in an in chuah lengmang hnga. Thlarau in hrin na si caan le si lo caan kha nazi pakhat hnu pakhat ai thleng lengmang fawn hnga. Na hrin tthan caan, tthan lo caan kha ai chawng peng hnga le na lung a mit hnga.
2. KHAMHMI HI TLAU TTHAN KHO USIH LAW, THIANG THLARAU HI KAN CHUNG AH A LUT LULUKMI/ ACHUAK LULUKMI ASI A HAU HNGA-Khamhnak a co cangmi hna cu kan chungah Pathian Thiang Thlarau kha a um (1 Kor. 3: 16). Pathian duhning in kan um caan poh ah Thiang Thlarau hi kan chungah um sehlaw, Pathian duh lo ning in kan um caan poh ah Thiang Thlarau hi chuak lengmang sehlaw, kum khat chung ah na sin in Thiang Thlarau a luh/chuah hi voi thong hra cu a si hnga. Khamhnak na co nakhnga na chung i Thiang Thlarau a um liote ah nangmah le nangmah nai thah na hau hnga. Thatnak na tuah lo lio hna i motor accident hna i na thih sual ahcun na lo ko hnga. Thiang Thlarau cu zumtu hna sin in a lut lulukmi le a chuak luluk mi asi lo ti kha va thei.
3. KHAMHMI HI TLAU TTHAN KHO USIH LAW, VANMI NIH AN RIAN AN TTUAN CAWK HNGA LO=Khamh cangmi hna cu vancung ah kan min ttial a si (Luke 10: 20). Nunnak cauk chungah kan min ttial asi. Pathian duh ning i na um caan poh ah na min hi vancung ah ttial asi i Pathian duh lo ning i na um caan poh ah vancung i na min i hloh asi ahcun, sualnak na tuah caan poh ah vancung i na min hi hloh a hau hnga i tthatnak na tuah caan poh ah na min hi ttial tthan lengmang a hau hnga. Sualnak cu atu le atu na tuak caah na min hi ttial lengmang le hloh tthan lengmang a hau hnga i na min ttial le hloh ah vanmi hi a re a thei tuk hnga i vancung a numanak zong hi vanmi nih an thei phah hnga lo.
4. KHAMHMI HI TLAU TTHAN KHO USIH LAW, BIBLE NIH KHAMHNAK A TLAU TER KHOTU SUALNAK HI A FIANH HNGA=Mi tampi nihcun khamhmi hna hi hell ah kan kal tthan kho ti an zumh. Asinain zeibantuk sualnak tuah ruang ah dah khamhnak hi a tlau ti kha an chim kho lo. Zudin ah a tlau a timi an um, lainawn ah a tlau a timi an um. Lihchim ah teh a tlau hnga maw? Thil thiang lo kan thinlung in kan ruahmi ruangah teh a tlau hnga maw? Sualnak lawngte an si cio ko. Zeibantuk sualnak dah khamh tlau le tlau lo nak caah ari asi? Khamhmi hi tlau tthan kho usih law, Bible nih khamhnak a tlau ter khotu sualnak hi a kan fianh hnga lo maw?-
5. KHAMHMI HI TLAU TTHAN KHO USIH LAW, PAUL HI MI RUREU ASI HNGA-Paul nihcun Khrih dawtnak he a kan tthen kho tu ding cu sermi thil vialte lakah pakhat hmanh a um lo (Rom. 8: 37-40) a ti. Kan khamhnak hi a tlau khawh tthan asi ahcun Paul chimmi hi a dik hnga lo i Paul hi mi rureu asi hnga.
6. KHAMHMI HI TLAU TTHAN KHO USIH LAW, JESUH I MI HROKHRAWL ASI HNGA-Jesuh nih, “Fapa a zummi poh cu zungzal nunnak an ngei (John 3: 36) a ti. “Fapa a zummi poh cu thihnak in nunnak ah an lan cang” (Johan 5: 24) ti ah a ti. Jesuh nih khamhmi cu zungzal nunnak an ngei a timi kan ngeih tthan lo ahcun Jesuh chimmi hi bia dik a si hnga lo i Jesuh hi mi hrokhrawl asi hnga.
7. KHAMHMI TLAU-TTHAN KHAWHNAK NA ZUMH AHCUN, KHAMH NAI FIANG LO-Pathian nih a ka khamh cang tiah nai lawm ngai ko hnga. A ca ah rian zong faakpiin na ttuan ko hnga. Laam le kui zong na hmang ko hnga. Asinain khamhmi kan tlau kho ko rih ti na zumh asi ahcun vancung na kai lai le lai lo, khamh na si te lai le si te lai lo nai fiang rih lo tinak asi. Hmailei ah zeiti na um te lai kha nai theih rih lo caah khamh na si lai le si lai lo nai fian rih lo tinak asi hnga. Khamhmi si lai le lai lo ai fiang rih lomi cu khamh ai fiang lomi he nan i khat bak ko.
Mi cheu nihcun sualnak ruang ahcun kan khamhnak cu a tlau lo, zumhnak dang, biaknak dang i kan kal i Jesuh kan zumh ti lo ahcun a tlau lai an ti. Asi ah, thil ttha asi mi, phaisa khi kan hlonh bal maw? Sui khi kan hlonh bal maw? Phaisa le sui nakin a ttha deuhmi Jesuh cu khamhnak a co cangmi nihcun an hlonh hnga maw? An hlonh bal lai lo. Khamhnak a co mi nih an zumhnak cu an ruahnak ah ai bunh lo, a rawk kho lomi Bible biatak ah ai bunh. Judas nih Jesuh a hlonh cu a hrintthan lo caah asi. Jesuh nunnak cu rak ngei selaw a hlonh bal lai lo.
Khamhnak hi a tlau tthan khomi va si selaw, lawmhpi awk zong a tlak hnga lo. Khamhnak kan co ko zongah hmailei ah kan thlau lai le lai lo hmanh ai fiang lomi thil asi hnga i i lawmh dingmi khamhnak zong asi hnga lo. Khamhnak hi a tlau khomi asi ahcun Pathian fa na si caan le Sehtan fa na si caan hi atu le atu ai thleng peng lai. Dr.Aung Mint Thang