Kahdohnak Ruangah Paletwa Khuapi Chung Um Zung Vialte An Khar. Chinram, Paletwa khuapi ah SAC ralkap le AA kar kahdohnak a chuak i zung vialte an khar, tiah tualchung mi hna sinin theih a si.
January 3 thawk in Paletwa khuapi ah SAC ralkap le AA kar kahdohnak a zual i Paletwa khuapi um SAC kuttang zung an khar pinah zung rianṭuantu hna zong a himnak hmun ah ralhrial in an zaam. Sii-inn, cacawnnak sianginn le bank vialte zong an khar dih, tiah theih a si.
Sii-inn rianṭuan le siibawi hna zong an zaam dih pinah sianginn cachimtu hna zong an zaam dih. Paletwa khuapi ah minung an um ti lo tluk a si i mi tlawm u lawng an taannak kong le meithal thawng le hriamngan thawng lawngte a thannak kong cu tualchung mi pakhat nih a chim.
Paletwa khuapi ah a taangmi hna zong cacawnnak sianginn le biakinn ah an i dor hna. January 3 kahdohnak ah hriamngan kuan nih kum 14 tluk ngakchia pa a tlak ruangah a nunnak a liam i hringtu a nulepa zong hliamhma faak ngai an pu, tiah theih a si. Paletwa tilawng dinhnak ah a ummi motor khaltu pakhat zong hriamngan kuan nih a tlak ruangah a nunnak a liam i hliamhma tuarmi hna thlopbul ding zong a har ngaingai, tiah tualchung mi hna nih an chim. TCP