Min Aung Hlaing he hmunkhatte ah riantuanti ZRA cu nizan ah CNA le tangti hriamtlai nih an phomh hna i ZRA hmunkhuarnak Carmel tlang sakhan ah an hriamnam zeimawzat an lak piak hna. Nai kahdohnak ah CNA leiin pakhat nunnak a liam. CNF biachimtu nih ZRA lei minung 11 an thi tiah a rak chim. ZRA le CNDF lei an thawngzamh Zalen nih cun ZRA minung pakhat lawng a thi tiah a chim ve.
Zotung Federal Council Tawlrelnak In Gangaw–Rezua Lampi Cawhremh Hram An Thawk- Magway ramṭhen le Chinram i pehtlaihnak Gangaw–Rezua lampi cu Zotung Federal Council tawlrelnak in May 2 khan lampi cawhremh hram an thawk kong Zatung Federal Council nih nizan May 3 ah an thanh.
Zingzan eidin tirawl le herhhai phurhnak kong ah harnak an ton caah Zotung Federal Council tawlrelnak in Gangaw–Rezua lampi cu Chinland cozah le ṭangṭi phu bawmhnak in ṭuan hram thawk a si i, Zotung, Matupi, Mara, Lautu le Senthang hmunram chung um mizapi nih awlzaang deuh in an hman khawh nakding ah cawhremh hram an thawk kong le cu lampi cu a biapi ngai mi lampi pakhat a si kong, Zotung Federal Council nih an thanh.
Mizapi ṭha tein khual an tlawn khawh nakhnga le lampi a rawh ruang ah thilphurh a har i thilman a fak mi a ṭum deuh nakhnga ruahchannak he Chinland cozah le ṭangṭi phu hna i bawm in Zotung Federal Council nih ṭuanvo la in a chuak mi tangka he aa tlak ning in a ṭha bik in lampi cawhremh timh a si kong cu Zotung Federal Council nih cun an thanh.
“Gangaw–Rezua lampi ṭha deuh in cawhremh nakding ca ah a biapi bik mi cu tangka thazaang a si caah lampi a hmang mi mizapi le motor ngei hna nih nan si khawh tawk cio in bawmhchanhnak rak ngei in nan kut rak samh ve u,” tiah Zotung Federal Council nih cun mizapi sin ah nawlnak an tuah.