Hakha Khua Ah Phone Line A Tlau Dih — Chin ramkulh Hakha khua ah phone line vialte a tlau dih tiah thawng theih a si. November thla zarh donghnak thawk in Hakha khua ah Telenor line tlau hram aa thawk cang i nihin tiang a ngah ti lo leng ah MPT line zong December 10 thawk in tlau hram aa thawk hi a si.
“Nizaan in MPT line a tlau chap caah rian herh le adang dang um ah phone i chawnh khawh zong a si ti lo. Chinland Network wifi bel hi VPN kan thlen ahcun hman khawh fangfang a si” tiah Hakha khuami pakhat nih The Chinland Post ah a chim. Kan hnu zarh chung zong ah MPT line chikhat a rak tlau bel cang nain a ngah ṭhan colh nain atu ah a van tlau ṭhan hi a si.
Hakha Khua Ah Datsi A Har Taktak Cang — Chin ramkulh, Hakha khua ah Datsi rawn awk a har ngaingai cang tiah thawng theih a si. December 10 zaanlei thawk in datsi rawn awk a dih pah cang hi a si i Hakha khuarthar lei ah a um mi Aung Aung datsi dawr le Gangaw lei kalnak lam ah a um mi ထူးသစ်ဆန်း dawr hna cu December 10 zaanlei thawk in datsi rawn khawh a si ti lo. Cun, Matupi lam, Cawbuk lei kalnak ah a um mi datsi dawr pawl zong cheukhat cu an khar cang hna i datsi a ngahnak hi dawr 2/3 lawng a um cang tiah theih a si.
December 11 zinglei ah datsi, 92 hi gallon 1 ah 20,000MMK in cawk a si i 95 hi 25,000MMK in cawk a si.
“Cawbuk lei kalnak datsi dawr pawl cu December 11 zinglei in i tlar cio a si. Minung pakhat nih gallon 1 cio hrawng in an cheuhnak hna dawr a um bantuk in pung aihre in aa cawk len mi zong an um. Datsi a rawng mi kan tam caah minung 1 nih tampi cawk lo in i cheubauh cio ah a ṭha hnga, cheukhat cu khualtlawng le khualei a kir duh mi an um caah an zawn kan ruah pah hna a herh” tiah Hakha khuami pakhat nih The Chinland Post ah a chim. Atu bantuk in Datsi a dih thluahmah nak a ruang hi Kalay-Hakha lam ah a pih bantuk in Mandalay-Gangaw-Hakha lam zong a pih caah a si i zei can dik lam a pih rih lai cu theih a si lo tiah Hakha khuami hna sin in thawng theih a si.