Hakha Thar Lamruk Tonnak Pawng Ah Kahdohnak A Chuak; Chin ramkulh khuapi Hakha, Hakha thar lamruk tonnak pawng ah Chin ralkap le SAC ralkap kar kahdohnak a chuak. Nihin December 18 zinglei suimilam 10:00 hrawng in Hakha thar lamruk tonnak pawng hrawngah SAC ralkap le Chin ralkap hna cu an i kap i suimilam 11:00 deng tiang kahdohnak a dai rih lo, kahdohnak ah a thimi le aa hliammi an um le um lo theih a si rih lo, tiah tualchung mi pakhat nih The Chin Post ah a chim.
SAC ralkap nih an kahmi hriamngan thawng zong a thang ngaingai. Khuate lei a ummi hna zong Hakha lei a panh ngam lomi an tam. Cu pinah Hakha ah Chritsmas laksawng zalh in a rami hna zong kir ngam loin an taap, tiah theih a si. Hakha thar lamruk tonnak a ummi SAC ralkap pawl cu Chin ralkap nih an rak kah tawn hna i aa hliammi zong an rak um pah, atutan kahdohnak ah thi le hliam kong theih khawh a si rih lo.
Hakha Peng Bungzung Khua Um SAC Ralkap Sakhan Chin Ralkap Nih An Kah. Chin ramkulh, Hakha pengkomh Senthang peng Bungzung khua um SAC ralkap sakhan cu Chin ralkap nih an kah, tiah theih a si.
December 17 zanlei in Bungzung um SAC ralkap sakhan cu Chin ralkap nih an kah i zan khuadei kahdohnak a chuak. Bungzung khua um SAC ralkap sakhan hi Chin ralkap nih kah dingin an helhumhnak a sau ngai cang kong ralhmai a kalmi Chin ralkap le anmah he naihniam in a ummi nih The Chin Post ah an chim.
Bungzung SAC ralkap sakhan cu December 17 zanlei in Chin ralkap nih an kah i nihin December 18 zinglei tiang zong ah meithal thawng a thang rih lo. Atutan an i kah ning zoh tikah voidang an i kah tawn ning he aa lo lo, a faak ngaingai, tiah tualchung mi pakhat nih a chim ve. November 28 lio zong ah Bungzung khua um SAC ralkap sakhan cu Chin ralkap nih drone le hriamhme in an rak kah cang.
Namsan Khuapi Chung Ralkap Sakhan Dihlak TNLA Nih An Laak. Shan ramkulh chaklei, Namsan khuapi chung ralkap sakhan dihlak cu TNLA nih an laak khawh. Namsan peng kahdohnak ah cun SAC ralkap 60 leng an thi i, minung 30 an tlaih hna pinah hriamngan telh in hriamnam tam ngai zong an laak khawhnak kong TNLA nih an thanh. A luancia December 10 thawk in Namsan khuapi ralkap sakhan dihlak cu TNLA nih an rak kah i, December 15, zanlei suimilam 3:30 hrawng ah Namsan khuapi chung SAC ralkap Division 101 sakhan dihlak, ralkap tlaihmi sehzung le palik sakhan telh in SAC zung vialte cu an laak dih, tiah theih a si.
Namsan khuapi chung ralkap sakhan cu Pakokku hrambunh Division 101 le a kuttang a simi Khah-Lah-Yah 258 hna i fonh in an umnak sakhan a si i ralkap no. 626 le 929 zong nih hram an bunhnak a si.
Namsan khuapi chung kahdohnak ah SAC ralkap Manton Khah-Lah-Yah 130 nih hriamngan he voi tam ngai kahdoh an bawmh hna pin ah Mi 35 in voi 1, ART-42 in voi 5, Jet Fighter in voi 19 le Y12 in voi 5 tiin kahdoh an bawmh hna ruang ah tualchung mi 3 an thi, biaknak he aa pehtlaimi inn le sianginn telh in inn 40 leng a rawk i inn 14 cu a ciam dih, tiah theih a si. Cu kahdohnak ah cun SAC ralkap 60 leng an thi i, minung 30 an tlaih hna pinah ralkap chungkhar in minung 64 zong TNLA nih an tlaih hna. Cu pin ah Honwitzer 4 hriamngan telh in bomb phunphun, hriamnam dang phunphun le ralkap hmanmi thilri tam ngai zong TNLA nih an laak khawh.