Luther Tin Hre- Israel Nih Iran A Kah. Iran, Syria le Iraq bom an puak len hna. Israel nih Iran a kahmi hna an si tiah news nih an tial. Nilini ah Israel nih “ni hnih chungah Iran ram chung hmun zeimawzat ka kah lai” tiah US a thanh. Tu zing Ningani ah Iran ah bom an puak len hna. An puahnak hmun hi Iran i Isfahan peng chung, vawlei tang Natanz nuclear inn, ralkap hmun tampi an umnak a si. Zei tluk tiang fak in dah a kah timi cu a fiang thlu rih lo.
Iran news tialning ahcun nuclear hmun cu a him ko. Ralkap hmun a si a ti. Ralkap an i hliam le khawnden kong a chim lo. International Atomic Energy Agency (IAEA) lei zong in “Nuclear hmun cu a him ko” an ti ve.
Iran hi nuclear ser aa lim deng cang an ti lengmang tikah Israel nih an tinhmi ah aa tel kho men ti kha ruah ciomi a si.
Iran tbk Syria tbk North Korea tbk ram i news chimmi cu zumh colk khawh an si tawn lo caah IAEA tbk nih an vun chimmi cu a hmaan ko lai. 2007 ah Syria nih thli thup taktak in nuclear a sernak inn pi cu Israel nih ciam viar in an kah ko lioah Syria nih “kan ral nih kan van an buar caah kan missile in kan dawi hna” a rak ti.
An sunghnak kha mipi theih ah langhter an duh bal lo.
Iran zong Syria khat bak te a si caah zumh tlu colh awk a that lonak a um ve lengmang. Iran Natanz nuclear inn pi hi Israel nih cat loin a ngiat lengmanhmi a si. 2020 ah Israel sungthoh nih Iran top nuclear scientist Mohsen Fakhrizadeh an rak thah cang. 2007 in nihin tiang Iran nuclear scientist 5 hrawng an thah cang hna.
Computer thiamnak zong in an doh i kham le hrawh peng an i zuammi nuclear inn a si. Vawlei tang pi ah sermi a si caah vanlawng zong in fawite in kah khawh phun a si rua lo. Syria nuclear in a kah cang; Iraq nuclear inn zong a kah cang, asinain Iran cu a kap kho ruam rih lo.
Tutan i a kahmi ah aa tel lo ahcun Israel nih fak tuk in kah taktak aa tim lo; Middle East a buai tuk lai tiah kuttum dorh in a minmen tein lehrulnak a tuahmi a si kho men. Iran ralkak umnak hmun a si hmanh ah Israel nih a langhter duhmi cu “ka zalh ahcun na ram chung cia ah ka duhnak hmun poah ah kan kah khawhmi na si kha i thei” ti seh a dawh cem ko a timi zong an um.
Iran lei nih an timi cu “drone, cruise missile le ballistic missile 350 hrawng in kan in kahmi hna khan kan buainsk donghter nan duh ahcun kanmah lei zong kan dai ko lai, asinain na kan lehrul than ve ahcun fak chinchin in lehrulnak kan kan in tuah than ve hna lai” tiah ralrinnak a rak chim cang.
Cucaah Israel nih lehrulnak a tuahmi ah hin a minmen in lehrulnak a kan tuah sawhsawhmi a si ko, lehrul than an hau ti lo tiah Iran lei nih an ti lai maw, asiloah direct in ka ram ka kap cicet ti lai ci tiah hngawng reh hrocernak phun in an kan lehrulnak a si ko tiin dah an rak ruahpiak ve te hna lai ……