MI ZEI BANTUK NIH DAH PASTOR LE EVANGELIST HI AN ȚUAN? A hmasa ah, thlarau laksawng pakhat a simi apostle sinak caah zeidah a herh timi zoh hmasa a herh. Jesuh a thawhțhan hnu a mit in a hmumi, Jesuh nih pumpak in a auhmi le Pathian nih khuaruaharnak tuah khawhnak laksawng a pekmi an si lawnglawng ah apostle si khawh asi (Lam. 1:22, Rm. 1:1, 2 Kor. 12:12).
Jesuh cu vancung ah a kai cang caah hi sinak hi ahomahnh nih tuchan ah tlinh khawh asi ti lo. Cucaah vawlei cungah Pathian nih Khrihfabu caah thlarau laksawng ah a pekmi “apostle” timi cu an um kho ti lo, a dong cang tinak asi. Hi laksawng hi a dongh cang i atu kan vawlei ah apostle an um ti lo ahcun Thlarau laksawng dang zonghi an dong kho vemi an si ti kha thei hmasa hna usih.
Zultu hna chan lio ah cun, pastor le evangelist rian hi pastor Thlarau laksawng le evangelist Thlarau laksawng pekmi nih an rak țuan (1 Kor. 12: 28). Asinain, atu kan chna ah cun, ȚUAN A ZUAMMI POH nih an țuan khawh. Pastor țuan khawhnak le evangelist țuan khawhnak caah thlarau laksawng a um ti lo. A duhmi le a huammi poh nih an țuan ciomi cu zaapi nih kan hmuh ciomi asi ko. El awk a tha lo.
Zeitindah țuan a duhmi poh nihcun an țuan khawh? Jesuh nih vawlei cung khuazakip ah va kal ulaw, va cawnpiak hna uh a ti i cucu țuan a zuammi poh nih țuan asi. Pastor si a duh mi poh nihcun, aho poh nih an țuan khawh. Asinain, pastor si a duhmi nihcun khamhnak kha an cohlan hmasa, Baibal siangin an kai, Baibal ning in an nun khawh nakhnga Thiang Thlarau bawmhnak an hal, pastor nih Khrihfabu a hruai ning an cawn, biachim holh-rel an cawn, dingrep ngei in an um, sermon țhațha an i ser, an inchungkhar thlarau nun an ser ve. Cucu pastor țuan a zuammi hna nih an tuah hmasami cu asi ve.
Pastor țuan an duh maw? Acunglei ah ka von țialmi hna hi zul law, pastor cu na țuan khawh cawlh hrimhrim lai. Thiang Thlarau nih pastor țuan khawhnak laksawng a ka pek tikah ka țuan te lai na ti ahcun, zei tik hmanh ah na țuan kho lai lo. Zeicatiah Thiang Thlarau nih zumtu laksawng a pe ti lo. Church foundation an tuah lio, Zultu hna chan lio lawngah laksawng pek a um.
Atu ah cun Pathian rian cu țuan a zuammi poh nih țuan asi. Pathian nihcun a rian țuan cu zumtu vialte a kan fial dih. Evangelist zong cu bantuk țhiam cu asi, țuan a duhmi poh le țuan a zuammi poh nih an țuan ve. Asinain, țuan a duhmi nih zeidah an tuah hmasa awk a herh timi kha cu von ruat ve ko.