Khampat Khuapi Cu PDF Le Ṭangṭi Phu Nih An Laak Ṭhan I Ralhrial Hna Zong An Kir Cang. Sagaing ramṭhen, Tamu peng Khampat khuapi cu SAC ralkap nih December 5 thawk in an rak fuh i tualchung mi hna cu ralhrial in an rak zaam dih. SAC ralkap pawl cu PDF nih faak ngai in an kah ve hna caah hnu an kir ṭhan i PDF le ṭangṭi phu nih Khampat khuapi cu an laak khawh ṭhan cang hnu ah ralhrial in a zaammi hna zong an kir cang, tiah theih a si.
PDF le ṭangṭi phu nih Khampat khuapi an laak khawh ṭhannak, tualchung mi ral a hrialmi hna zong December 20 thawk in khuachung ah an kir cangnak le SAC ralkap nih vanlawng in kahdohnak an tuahmi kong ah innlo a rawkmi a tamnak kong cu Chin hriamtlai Salai Van Kio nih Ayeyarwaddy Times ah a chim.
Khampat khuapi la ṭhan dingin rallam a sialmi SAC ralkap pawl cu PDF le ṭangṭi phu nih faak ngai in an kah hna caah December 16 ah SAC ralkap pawl cu hnu an kir. PDF le ṭangṭi phu nih hmunhma thianhhlimnak an tuah lioah ralkap ruak 10 hrawng zong an char, tiah theih a si. Khampat khuapi cu November 7 ah KIA, PDF Tamu pengkomh Battalion 2, military region 2, No. 1 Battalion, CNDF, TDA, RKDF le KNA-Burma hna i bawm in an rak laak hnuah SAC ralkap 200 leng nih Khampat khuapi cu an fuh ṭhan nain an laa kho lo.
Hakha Khuapi Chung Ah Tu Kum 2023 Christmas Hlunghlai Piin Tuah A Si Lo. Chin ramkulh, khuapi Hakha khuachung ah HCMF nih tu kum(2023) Christmas cu hlunghlai ngai in tuah lo ding ah thawng an rak thanh bantukin hlunghlai piin tuah a si lo, tiah theih a si. “HCMF nih tu kum 2023 Christmas cu hlunghlai ngai in tuah lo dingah thawngthanhnak an rak tuah bantukin Hakha khuapi um Khrihfa bu kip ah Christmas hlunghlai piin tuah a si lo. A bik in dohthlennak lio a si i mi bu piin Christmas caan hman lo le ramtang um fanau hna zawnruahnak he hlunghlai ngai in Christmas tuah a si lo,” tiah tualchung mi pakhat nih The Chin Post ah a chim.
Hakha khuapi ah hlunghlai ngai in Christmas tuah lonak hi 2020 covid lio in a si cang. SAC nih nawlngeihnak an laak hnu in mah le Khrihfabu kip ah pumhnak in Christmas caan hman deuh a si. Sathah, rawlhrawmnak le laksawng thlennak tuah a si lo i lakphak le changreu dangh a si. Cheukhat Khirhfabu ahcun lakphak le sathluak zong an dangh hna, tiah theih a si.
Hakha khuapi Khrihfabu kip ah cun pumhnak lawng in Christmas caan hman a si nain khuate lei ah cun hlunghlai tein Christmas an tuah i caan an hmang kho hna. Khuate lei ahcun anmah le khuami ramdang ummi nih Christmas a tuahpiakmi zong an um, tiah tualchung mi pakhat nih cun a chim. HCMF nih thawngthanhnak an rak tuahmi ah Hakha khuapi ah 2024 Kum Thar zong hlunghlai ngai in tuah lo ding ah an rak thanh bantukin Khirhfabu kip nih sathah le rawlhrawmnak tuah in Kum Thar don an i tim lo, tiah theih a si. TCP