Lailenpi kahdohnak in Mizoram ah a zaam mi SAC ralkap pawl India Cozah nih Myanmar ram leiah an kuat than hna. Chin ramkulh, Lailenpi khua laak kahdohnak in a zaam mi SAC ralhraang 30 cu November 28 ah Mizoram, Siaha District, Laki khua Assam Rifles camp an phan i, India Cozah nih nihin November 29 ah helicopter in Myanmar ram lei ah a kuat hna tiah kan theih.
Laki khua Assam Rifles ralkap kut ah aa pe mi SAC ralhraang hna cu Tuipang Assam Rifles ralkap le Tuipang palek nih an va laak hna. Cun, nihin November 29 zinglei ah India Cozah Arms & Ammunition nih thip hnih ah, helicopter in an laak hna i Manipur State, Moreh khua ah an kalpi hna; cu hnu cun Myanmar ram Tamu khuapi ah kalpi an si lai tiah Mizoram tualchung media hna nih an tial.
Chin Ramkulh, Matupi peng ah a um mi Lailenpi khuapi cu CNA hruai mi Chin ralkap phu komh nih November 24 ah an rak laak. Tu tan i Mizoram, Siaha Distric ah a rak zaam mi SAC ralkap pawl hi Lailenpi SAC camp in a rak zaam mi an si tiah theih a si. A luan cia November 13 zong ah Chin ramkulh Rihkhawdar khuapi cu CNA hruai mi Chin ralkap phu komh nih an laak i SAC ralkap 43 cu India ram chung Zokhawthar palek sakhan ah an rak i pe.
Cu SAC ralkap hna cu India Cozah nih Manipur state, Moreh khua in Myanmar ram ah a rak kuat cang hna. Cu bantuk thiamthaim in November 15 ah Falam peng, Tibual camp in a zaam mi SAC ralhraang 28 zong November 16 ah Mizoram Saikhumphai khua ah an zaam i, India Cozah nih Myanmar ram ah a kuat than hna tiah kan theih. TCP