Chinram Thlanglei Matupi Peng Ah April Thla Chung Ah Tanghra Camipuai Tuah Ṭhan An Timh- Chinram thlanglei Matupi peng, No.2 siangsangrun sianginn ah April thla chung ah tanghra camipuai cu tuah ṭhan an timh kong SAC nih March 30 ni ah an thanh. 2023-2024 cawcawn kum tanghra camipuai cu a luancia March thla chung ah rak tuah a si i, siangngakchia 18,000 hrawng phi lo in an bau caah April thla chung ah phitter ṭhan an si lai, tiah SAC nih cun an thanh. Kahdohnak a fahnak ramṭhen le ramkulh 14 ah a ralai mi April 29 in May 6 tiang tanghra camipuai tuah a si lai i, a hlei in timhlamhnak ṭha ngai he tuah timh a si kong SAC nih an thanh mi ah an langhter.
A luancia March thla chung ah tuah mi camipuai ah Chinram chung in camipuai phit ding ah min a pe mi siangngakchia 1,000 leng an rak si nain minung 401 lawng an phi, tiah theih a si. SAC ralkap nih hramhram in nawlngeihnak an laak hnu in tanghra camipuai a phi mi an zor ngai i, 2023-2024 cacawn kum ah tanghra camipuai a phi mi an zor khun, tiah Institute for Strategy and Policy-Myanmar nih an thanh.
SAC Ralkap Nih Mindat Peng Ah Raltuknak Vanlawng In Bomb An Thlak– Chinram thlanglei, Mindat peng, Station 2 lei ah SAC ralkap nih raltuknak vanlawng Jet Fighter in nihin April 1, zing khuadei hlan ah voi 10 hrawng bomb an thlak, tiah Mindat peng thawnglatu HKL nih an thanh. Mindat peng, Station 2 hmunram chung ah SAC ralkap nih nihin April 1, zanṭim suimilam 1:00 hrawng ah pound 500 tluk a rit mi bomb pahnih an thlak pin ah, chun suimilam 11:30 hrawng ah Jet Fighter pathum in voi 6 bomb an thlak ṭhan, tiah tualchung mi nih an chim.
Nihin bomb an thlak mi kong he pehtlai in inn a rawk mi le hliam a tuar mi an um le um lo fehternak a um rih lo.Chinram chung ah Mindat peng cu SAC ralkap nih vanlawng in kahdohnak an tuah biknak hmun a si caah inn a rawk mi a tam pin ah tualchung mi thi le hliam an tam ngai cang. A luancia March thla chung zong ah vanlawng kahdohnak ruang ah tualchung mi 4 an thi i minung 5 hliam an tuar, tiah theih a si.