Lailenpi Hngaktu CNA le CDF Mara Cu MDF Nih An Kah Hna I, CNA Le CDF Mara In Ralkap 2 Nunnak A Liam. Chinram, Matupi peng, Lailenpi khuapi ah humhimnak a latu CNA le CDF-Mara cu Maraland Defense Force (MDF) nih nihin January 24, zinglei suimilam 10 hrawng ah an kah hna i Chin ralkap 2 an nunnak a liam pinah minung pakhat hliam a pu, tiah theih a si.
Tuzing kahdohnak ah hin CNA in Corporal pakhat le CDF-Mara in Company Commander pakhat nunnak a liam i, CDF-Mara in Battalion Comander pakhat hliam a pu, tiah theih a si. Lailenpi khuapi cu a liamcia 2023 November 24 ni ah CNA hruainak in ṭangṭi phu nih an rak laak i khuapi chung le Mara hmunram cheukhat hna ah CDF-Mara nih mizapi i ukhruainak ding ca ah a lamkip in ṭuanvo latu ding phu zong an rak dirh i Chin ralkap nih humhimnak an laakpiak hna, tiah theih a si.
A luancia ni tlawmpal zong ah MDF phu nih CDF-Mara Tactical Operation Command pakhat telh in minung 6 an tlaih hna i nihin tiang an thlah rih hna lo. Cun, Lailenpi khuapi luhchuahnak lampi zong MDF nih an khar, tiah theih a si.