MDF hriamtlai hi minung 50 hmanh an tling ti lai lo tiah anmah MDF hriamtlai azammi sinin theih a si. Ramleng Mara khuasa mi dirhmun ah MDF hi milu cun an tam deuh ko nain practical in miphun dohthlennak caah thazaang achuahmi ahcun CDF-Mara hi kan thazaang a thawng deuh ngaingai tiah JP nih achim.
Pu Sang Lian, Pu Ram Khar le Rev Lian Thuam nih thil sining kong an langhter mi chungin tlawmpal highlight ka vun tuah lai. An chimmi hi Chinmi Laimi nih ruahphu le ruahtlak taktak an si hna. An chimmi cu, Nihin MDF nih an I palh bak mi cu, India Mara nih anmah te in ram an neih I Maraland tiah an timi kha an char ve I Chinram zongah Maraland tiah an ti ve.
Mara cu chimlo ralhrang MAH ruangah nihin ah Chin miphun hmanh nih Land timi kan nei kho lo. Chin miphun nih Chinram timi kan neih khawhnak dingah heh tiah dohthlennak kan tuah cuahmah. Chin miphun nih teinak kan hmuh i Min Aung Hlaing kan thawl khawh hnu lawngah Chin miphun nih RAM kan nei lai i Mara zong nih Maraland kan nei kho ve ti hi MDF nih an I fiang lo.
Maraland timi ruahnak achuahpitu hna hi India lei ah zeimaw tiin saya/teacher a tuanmi pawl idea a si, anmah hna ruangah tampi Mara an kan hrawh. Cucu an I fiang kholo caah tuah hmasa ding, doh hmasa ding ralhrang kha dohlo in CNA le CDF tu an kan doh hi a si. Mara CDF an ci kan hmih hna hnu ah CDF Zotung, CDF Lautu pawl kan phomh te hna lai tiah an ti.
Nihin ah MDF pawl nih cun Kanmah cu CHIN kan si lo ti bak a si. Chinram chungah Mara a um ti zong hi MDF nih an I fiang kho lo. Lailenpi ralhrang sakhan kan lak zong kha an I lawm hrimhrim lo, ziah kanmah theihlo in Lailenpi sakhan an kah an ti. Lailenpi sakhan kan lak hnu ah an I thawh I kanmah tu cu an kan kah I an kan thah. Cucaah MDF hi Min Aung Hlaing bantuk in ralhrang bak an si ko.
Nihin ah an kan tlaihnak kong zongah khuaruahhar an sinak cu, tha tein rak ra ulaw nan naule kan tlaihmi hna hi rak la u, nan umkalnak tuanvo kan in lak hna lai tiah an kan ti I CDF rawlbawi pahnih cu an va kal tikah tlaih ciami thlah cu chimlo, anmah CDF ralbawitu cu an rak tlaih chap hoi hna. Cubantuk khuakhan cu hriamtlai dang zong nih a tuahmi an um bal lai lo, MDF lawnglawng an si. Ataktak ahcun Mara ramchungah CDM tuah hlah u tiah a titu an si, zoh ulaw Hakha ah CDM tuah a duh lomi hna khi Mara, Falam le Tedim kan tam bik lai.
Cuhlan ah MDF a tanh taktak mi USA upa tampi cu an lungfim cuahmah, MDF an kalning a dik lo ti hi an chim cang. Min Aung Hlaing nih uknak a vun lak tlawmpal ah biaruahnak a kan tuah te lai I cu tikah Mara minin kan kal ve lai I kan duhmi kan hmu lai tiah ruahchannak an nei. Nain cucu a um ti lo tikah an iruahchanmi tlam a tling ti lo. Cu hnu zongah MAH ralhrang hi kan doh lai lo, remnak in kan kal lai ti hi an chim pengmi a si.
MDF nih cun kanmah cu Chin kan si lo caah India Mara he Maraland kan ser ti lai, kanmah tein kan um lai ti hi an policy a si caah Chinland Council sernak zong an cohlan duhlo mi asi. Kanmah tein kan i uk lai tihi an policy cu asi ko. Pathian bawmhnak thawngin Lailenpi ralhrang sakhan kan lak hnu cun mipi kan tha a dam deuh cang lai, kan hnangam deuh cang lai tiah kan ruah lio ah kanmah le mah lila kan hmunram chungah harnak kan tong than.
Chinland Council dirh a si mi hi kan ipalh hrimhrim lo, a tlai hmanh kan tlai tuk tiah kan hmuh ning a si. Hihi kan dirkamh awk hrimhrim a si . Kanmah CDF-Mara hi zapi nih thazaang kan pe ko uh, kan nih cu nan unau kan si, nanmah he a tangti mi nanmah he riantuanti kan si I nan policy ah a ummi kan si ko. Hi hnu pinlei zongah thazaang kan pe peng ulaw kan bawm peng hram ko uh tiah Vaurawng ah an chim.