Bible Ning In Min Aung Hlaing hi Kawlram Uktu A Si Kho Maw? Bible ah “Nanmah an uktu hna an nawl kha ngai uh” tiah Hebru 13:17 ah kan hmu. Bible tuanbia kan zoh ahcun Cahlun chungah miphun uktu a timi hna khi Pathian nih Amah prophet hmangin a thimmi lawngte an si hna. Cu caah “Cubantuk uktu bawi cu an nawl ngai hna u” tiah Bible nih a kan timi a si. Nihin ah kan Kawlram uknak latu Min Aung Hlaing hi aho nih dah a thim timi zoh tuah hna u sih.
Min Aung Hlaing, Than Swe, Saw Maung, Ne Win hna khi Kawlram uktu dingah Pathian nih a thimmi hna si loin anmah tein nawlngeihnak power duh ah hramhram in hriamnam he mipi a kan uktu an rak si deuh. Cu caah Min Aung Hlaing hi Pathian nih kanmah uktu dingah a thimmi asi lo ti hi Bible cherhchan in ka hmuh ning le ka zumh ning cu a si.
Pathian nih athimmi miphun kha Amah nawl an ngaihlo ahcun an umnak ramchung ah si loin ramdang uktu kutah a chanh hna. Prophet Samuel hmang in Israel miphun uktu ah Saul thim asi kha Pathian hnatlaknak a sinak cu Israel mipi nih an duhmi asi caah Saul cu rak thim a si. Nain nihin Kawlram uktu hna khi mipi nih kan duhmi hna pakhat hmanh an um lo. Kawlram minung 10% hmanh nih kan duh hna lo nain hriamnam he an kan uk hi a si.
Cu caah nihin Laimi Pathian bia cawnpiaktu chungin cheukhat hmurka in a chuak mi cu, Nihin Kawlram nih kan tonmi thil hi Pathian khuakhannak a si, zeipoh hi Pathian nih a khan cia mi chung in a ummi lawngte an si tiah an ti. Pathian nih a khan taktak mi asile silo cu Biakam Hlun ah uktu thimnak kong alanghter ning ruat than law na fiang ve ko lai. Cu caah Min Aung Hlaing hi mipi uktu dingah Pathian nih a thimmi a si kho lo ti hi langhter ka duh mi a si. ceuuk