KNLA le PDF Nih SAC Helicopter Pakhat An Thlak “Karen ramkulh, Myawaddy khuapi, Thingannyinaung khua Khah-Mah-Yah 355 SAC ralkap sakhan ah a zuang mi SAC ralkap Helicopter cu KNLA le PDF Cobra Column nih an thlak pin ah a chung ah aa cit mi Division 44 Commander fak ngai in hliam a pu i minung 5 hrawng an thi,” tiah PDF lei chimnak nawlngei pakhat nih fehter in a chim.
“SAC ke ralkap Khah-Mah-Yah 355 sakhan ah a zuang mi SAC ralkap Helicopter pahnih cu KNLA le PDF Cobra Column nih Missile Point 5, Sniper, hriamngan le hriamhme he an kah i Helicopter khaltu an khen hnu ah Helicopter pakhat cu an thlak khawh,” tiah PDF in chimnak nawlngei nih cun a chim. “SAC ralbawi ngan deuh nih an i cit tawn mi Eurocopter phun a si mi Helicopter a tlak ruang ah Division 44 Commander, Brigadier Aye Min Aung fak ngai in hliam a pu i a thih zumh a si,” tiah PDF in chimnak nawlngeitu nih a chim chap. US Dollar nuai 9 man hrawng a si mi SAC ralkap Helicopter a tlaknak kong he pehtlai in KNLA hruaitu hna le PDF Cobra Column hruaitu hna zong nih fehter in an chim ve.