SAC Nih Kum 3 Uknak Laak Hnu Ah A Thar In Thla 6 An Chap Ṭhan! SAC runvennak le humhimnak lei ṭuanvo ngeitu hna cu nizan January 31 ah Naypyitaw ah tonnak an ngei i, nawlngeihnak thla 6 an chap ṭhan.SAC ralbawizik Min Aung Hlaing nih rambuai lio laak hruak caan karlak a si rih caah thla 6 chung nawlngeihnak chap ding in biatung a chuahpi i, runvennak le humnak lei ṭuanvo ngeitu hna nih dohkalhnak um loin an cohlan piak, tiah theih a si.
Nizan January 31, Naypyitaw meeting ah ralbawizik Min Aung Hlaing, ralbawizik chang Soe Win, caan karlak President Myint Shwe, NLD chan lio Vice President Henry Van Ṭhio telh in a dang minister tam nawn an kai, tiah theih a si.SAC nih nawlngeihnak an laak hnu in Min Aung Hlaing nih nawlngeihnak caan a sauh hi a voi nganak a si cang.
Nizan ṭhiam ah NUG lei nih an rak thanh tawn bantuk in hramhram uknak a hram bongh, 2008 phunghrampi hrawh a sinak le Federal Democracy ram an ser lai kong an thanh ve. SAC runvennak le humhimnak Council cu SAC caan karlak President le Vice President, Pyituh Hluttaw Speaker, Amyotha Hluttaw Speaker, ralbawizik Min Aung Hlaing le a changtu Soe Win, runvennak Minister, ramleng Minister, Minister of the Interior le Minister of Border Affairs telh in minung 11 nih an ser mi a si.TCP