SAC nih tuah mi People’s Military Service Training (pyitu-sit) No.2 le hriamtlai ralkap lut thar karh
Yangon ramkulh hmunkip in minung 294 People’s Military Service Training ding in 7 Biangreithlep ah Bayint Naung Transit Centre an phan. Yongon Region Cheid Minister U Soe Thein, SAC Cozah rianṭuan lutlai, tualchung nawlngei le ralkap upa (senior) hna nih donnak an tuahpi hna. An dihlak in hman le ngeih a herh bak mi, chuncawn dur, haangthlum (soft drinks), ti-dur tibantuk telh in thil phun 16 cio pek an si. Yangon Region Command ṭhithruainak in anmah le umṭhutnak ding hmun le hma cio ah chiah an sinak kong, nawlngei nih an chim.
A voi hnihnak Ralhriam tlai ralkap cawn ding timhtuah mi zong hmunhma langhter lo mi pakhat ah an phan. Ngamdamnak lei ṭuanvo ngeitu hna nih felfai tein zohfelnak an ngeih hna hnu ah, tangka le adang herhhai bawmhnak peknak a ngeih hnanak le, donnak an tuahnak kong chim. 10 February 2024 thok in ralkap luh ding nawlchuah hnu ah voikhat tuah a si cang. Anmah SAC tinh ning ah cun thla fatin minung 5,000 lak i, kum khat ah 60,000 hmuitinh an ngeihnak kong, tualchung thawngzamh pakhat nih thanh.
Paletwa Peng Ralzam Siangngakchia Ca Ah Paletwa Education Centre Nih Sianginn An Hon– Chinram, Paletwa peng in Mizoram ah ralzam in aa dor mi siangngakchia hna nih fimcawnnak an pehzulh khawh nak ding ah India-Myanmar ramri hmun pakhat ah Paletwa Education Centre nih sianginn an hon, tiah theih a si. Paletwa peng chung SAC ralkap le AA kar kahdohnak ruang ah ral a zaam mi siangngakchia hna nih fimcawnnak an pehzulh khawh nak ding ah tiin Mizoram Lawngtlai District ramri khua pakhat ah sianginn an hon kong Paletwa Education Centre Director Saya Moses nih chim.
Paletwa ah sianginn hon ṭhan ding in timhlamhnak a um ti lo pinah siangcachim zong an um ti lo caah ralzam siangngakchia pawl cu sianginn an kai khawh nak ding ca ah timhlamh mi a si, tiah Saya Moses nih a chim chap. A hramthawk ah cun Middle le High School lawng hon ding in timhtuah a si nain nulepa nih nawlnak an tuah ruang ah Primary in High School tiang hon ṭhan a si lai. May 1 in minpek caan hon a si i May 20 in cacawn thawk a si lai, tiah a chim.
May 13 tiang min a pe mi 190 leng an si cang i khuate lei in a rak kai ding he an zapi ah 400 leng an si. Cachimtu ding minung 25 an um, tiah ṭuanvo ngei pakhat sin in theih a si. “Sianginn honnak ding ah umṭhutnak le caholh lei zong in harsatnak tampi a um pinah cachimtu umnak ding inn sak zong kan lim rih lo. Sianginn herhhai zong tampi a um rih. Kan sin i min an pek ning in an rat khawh a si ahcun minung 500 hrawng an si lai caah bawmh kan herh ko,” tiah Saya Moses nih a chim.TCP