CNA Captain Nehemiah nih kan ram mino hna sin a biacah cu ROLING a si. A timi cu, ‘Tulio cu mino tampi kan lung a vai vuan ngai men lai,Kawl ralkap sin ahcun maw na fonh lai Ram dang ah maw na zam lai, CNA/CDF ah maw na lut lai, Rian rang in Ram dang kal kho na si lo ahcun na lungawtawm duh hlah kan ram caah na tuan khawh tawk rak i zuam ve ko, Kan ram nih an herh tuk kha philh hlah, kan ram nih zeitik caan poah ah an welcome peng ko, kan ram caah cun na sunglawi tuk, na chan lio te ah na tikhawh tawk na ngeichun na thazaang chuah in na ram hi rak veng ve’.
Chinland Council Nih Chinram Le India Ramri Rithaisii Cawkzuarh Kong Ah Mizapi Sin Ralrin Peknak A Tuah= A voi thumnak Chinland Council chungtel nih biachahnak an tuah mi bantukin Chinram le India ramri ah phungbuar in rithaisii a phur i a zuar mi hna cu phungning tein dantat nan si lai, tiah nizan March 18 ah Chinland Council nih a thanh.Chinland Council Cathanh i a langh ning ah Rithaisii a phur i a zuar mi hna cu SAC ralkap nih hramhram in nawlngeihnak an laak hlante in a phur tawn mi an si i, ram a buai hnu ah caanṭha i laak riangmang in Myanmar ralzaam min hmang in a hlan nakin rithaisii a phur i a zuar deuh mi an si.
Myanmar ralzaam mi vialte zong nih nan i dornak hmun India ram phunglam ṭha tein zulh i zuam in rithaisii phurhzuarh kong ah i tel hrimhrim hlah u, rithaisii a phur i a zuar mi nan theih hna ahcun nan umnak peng nawlngeitu hna le ṭuanvo ngeitu sin ah thawng pe colh u, tiah Chinland Council nih cun Myanmar ralzaam mi a forhfial hna. Chinland Council nih a uk mi hmunram chung le India ramri hmunkip ah rithaisii cawkzuarh cu Chinram cozah le zatlang ukhruaitu phu nih an kham bantukin a cingtu, a phurtu le a zuartu vialte cu phungning tein dantat an si lai, tiah Chinland Council nih a thanh mi ah a langhter.TCP