Kalay Peng Kahdohnak ah Mizapi Ralkap 3 nih Nunnak an Pek- Kalay peng kahdohnak ah PDF-Zophai in ralkap pahnih le SR ralkap pakhat an nunnak a liam, tiah theih a si. PDF-Zophai in Tv. Lal Chan Dam (kum 17) le Tv. Van Lal Ring Lian (kum 19) le SR in Tv. Golden Pui (kum 20) cu SAC Drone bomb ruang ah an nunnak a liam. An pathum in nihin April 28 zinglei ah an ruak an vui hna, tiah theih a si.SAC nih Kanpetlet peng ah vanlawng in bomb a thlak i minung pathum hma an pu.
Nihin April 28, chun hnu sml. 1:30 hrawng ah SAC nih Kanpetlet peng, Lundon khuate ah vanlawng in voi hnih bomb a thlak hna caah minung pathum hma an pu tiah theih a si. SAC Vanlawng bomb thlaknak ruang ah kum 68 patar pakhat le kum 45 nu pakhat cu an hma a faak i, kum 18 nu pakhat tu cu a hma a faak tuk lo tiah Kanpetlet Peng Zapi Ukhruainak Phu nih a thanh. Lundon khua cu inn 30 hrawng khuasaknak khua hmete a si i, vanlawng bomb ruang ah khuate sii peknak inn le khuami inn pathum cu an rawk dih.
Kanpetlet peng ah SAC nih 2024 April 3 ah Phianchaung khuate ah voi khat; April 17 ah Ung, Luisung le Kauhsaung khuate ah voi khat ti in April thla chung ah vanlawng hmang in kahdohnak a rak tuah cang. Nihin April 28 ah Lundon khua te cu voi hnih vanlawng in a rak doh. Cu vanlawng bomb thlaknak pawl ah cun sianginn le sii-inn tibantuk hi aa tinh mi an si caah, cuka hmun pawl cu a hlankan in hrial ding, dornak khor cawh ding le vanlawng raal i khamhnak tuah cio ding zong Kanpetlet Peng Ukhruainak Phu nih forhfialnak a thanhchih.