Khampat Ah SAC Ralkap Nih Hriamtlai Phu Ralkap 6 An Tlaih Hna I, 4 An Thah Hna. Sagaing ramṭhen, Khampat khua pawng ah SAC ralkap nih hriamtlai phu ralkap 6 cu December 5 zan ah an tlaih hna i, pali cu hngawng tan in an thah hna i pahnih cu an luat, tiah hriamtlai phu sinin theih a si. Khampat khua nichuahlei ah sentari a cawngmi hriamtlai phu ralkap 6 cu Khampat khua laak ṭhan dingin rallam a sialmi SAC ralkap nih an tlaih hna. Nihin December 6 zinglei ah ruak 4 le a zaammi 2 lakah pakhat hmuh an si i a dang pakhat hi hmuh a si rih lo, tiah Zalen nih a ṭial.
Khampat khuami pakhat nih cun, SAC ralkap nih minung 4 an thah hna tiin thawng theih a si i, Khuami cheukhat zong an zaam lio a si caah thawngpang fiang tein theih khawh a si lo, tiah The Chin Post ah a chim. Kalaymyo le Mawleik khuapi ah a ummi SAC ralkap 200 hrawng nih Khampat khuapi laak ṭhan dingin timhtuahnak an ngeih caah Khampat khuami cheu khat zong a himnak hmun ah an zaam hna, tiah theih a si. TCP