Vakok-CNDF Cu CNO/CNDF In An Chuak– Kum 2 chung CNO/CNDF ah um in dohthlennak a tuah mi Vakok-CNDF cu CNO/CNDF in kan chuak cang tiah December 6, 2023 ah Vakok CNDF nih cathanh an chuah. Hi kong he pehtlai in Vakok CNDF hruaitu pakhat nih cun “Anmah sin ah um dingin bia kan rak i ruah lio ah a herh ahcun chuah than i hawikom sinak in um ding ah kan rak ti mi a si ko. Tutan kan chuah hi zeidang ruang ah a si lo. Kan policy ah kan i khah lonak a um. Cu pin ah kannih cu Lairawn deuh ah a cawlcang mi kan si caah pehtlaihnak tuah zong a har, cucaah kan chuahnak a si” tiah The Chin Post ah a chim.
Vakok battalion hi September 9, 2021 ah rak dirh mi a si i CNO/CNDF hruaitu hna he an i ceih hnu ah October 17, 2021 ah CNO/CNDF ah an i fonh i CNDF Brigade 1, battalion 2 in an um. Cu hnu cun Vakok CNDF tiah theih an si. Chinland Council dirhnak kong he pehtlai in Vakok Battalion hruaitu pakhat nih “Atu lawng cu CNO/CNDF in kan chuah a si i Chinland Council dirhnak kong ah zeihmanh chim khawh mi ka ngei rih lo, asinain tuanvo ngeitu hna nih an kan sawm a si ahcun kan i ceih lai i a tam deuh duhnak in biakhiahnak kan tuah ko lai” tiah The Chin Post ah a chim.TCP
CDF Tonzaang Nih Lakhruak In Cathanh An Chuah : Chinland Council Conference ah Tonzang peng aiawh kan kai lai lo tiah ZFU PDF- Zoland+ CNO+ CDF- Mindat phunthum nih CDF Tonzang hruaitu lungtlinnak tello in thawng an thanh. CDF-Tonzang cu Chinland Council tonnak ah kan kai lai tiah CDF Tonzang nih lakhruak in cathanh an chuah colh. Chin miphun lungrualnak le ralhraang uknak cihmih nak ding hmuitinh in tuahtimumi Chinland Council tonpumhnak ah Tonzang zapi ukhruainak phu le CDF Tonzang hruaitu kan kai lai tiah cathanh an chuah.
CNC-Mindat/CDF-Mindat, (CNO/CNDF, ZFU/PDF Zoland, han nih cun CNF/CNA le MP cheukhat hruainak in Chinland Council a dir khawhnakhnga a ra lai mi Dipa 7-9 ah tonpumhnak tuah an timh.
Hi an meeting auhmi hi zauk phung he aa rem lo hlei ah tlukrualnak a um lo mi ah i funtomnak lamhruai khawh kan zum lo. Cucaah hi meeting ah hin Falam peng, Tedim peng, Tonzang peng kan kai lai lo tiah cathanh an chuah. Cathanh an chuah suimilaam pakhat rauh ah CDF Tonzang nih kan kai lai, hi cathanh hi CDF Tonzang nih kan theihpi hna lo tiah lehnak an tuah colh. The Lairam Times
