Rakhine an khualipi Kyauk Taw le Rangon-Sittwe tlawnkainak ah a biapi taktak mi Kisapanadi hleipi cu nizan Feb.11, zan suimilam 8:35pm ah ralhrang nih Jet fighter in bomb an thlak hnawh ruangah hleipi cu a rawk dih tiah report nih alanghter. AA nih Kyauk Taw khuapi an lakin Kisapandi hlei ah AA thantar Flag an tar. Mah an tarnak hlei cu ralhrang nih bomb an thlak hnawh hi asi ko tiah khuami nih an chim. Culawng hlah, Min Chaung hlei zong ralhrang nih voihnih bomb an puah hnawh cang.
Feb.9 ah voikhat an puah hnawh hnu ah Feb.12 ah an puah hnawh than. Ralhrang nih hin Min Chaung hlei zong hrawh dih an tim tiah report nih alanghter. Min Chuang hlei hi Sittwe khuapi pawngkam khuate tampi nih an zulh mi asi. Pawngkam khuate thil zuarmi hna nih Sittwe lei thil zuar dingin an kalnak an zulh bikmi asi.
Feb.9 voikhat bomb an puah hnawh ah hin tlawmpal cu minung nih zulh khawh asi rih ko nain, nihin Feb.12 ah avoihnihnak an puah than ah cun hlei hi a dihlak in a rawk dih cang caah zulh khawh a si ti lo, a rawk dih cikcek cang tiah an ti.