Kachin Baptist Convention Chairman Hlun Rev. Dr. Hkalam Samson Cu SAC Nih An Tlaih Ṭhan- SAC nih Myitkyina thonginn ah kum 6 thong thlak ding in bia an rak ceihpiak mi Kachin Baptist Convention Chairman hlun Rev. Dr. Hkalam Samson cu nizan April 17 thongtla luatnak a hmu mi lak ah aa tel ve nain SAC ralkap nih a umnak inn ah an tlaih ṭhan, tiah KBC in ṭuanvo ngei nih an chim.
Rev. Dr. Hkalam Samson cu thawngṭha a chim mi ruang ah a liamcia 2022 December 4 ah Mandalay Airport ah SAC ralkap nih an rak tlaih i, kum 6 tiang thong thlak ding in bia an ceihpiak nain kum khat le cheu hrawng thong a tlak hnu ah nizan April 17, chunhnu suimilam 1:00 hrawng ah luatnak a hmu nain zan suimilam 10:00 hrawng ah SAC ralkap nih a umnak inn ah an va tlaih ṭhan kong KBC in ṭuanvo ngei pakhat nih cun a chim.
“Zeiruang ah dah Dr. Hkalam Samson hi an tlaih ṭhan hnga ti kan hngal ve lo, zahan zan suimilam 10:00 hrawng ah khan an tlaih i Rev. Dr. Hkalam Samson nupi le Peace-talk Creation Group(PCG) chungtel pakhat zong an tlaih chih hna,” tiah KBC in ṭuanvo ngei pakhat nih a chim.
Tlaih a tong mi Rev. Dr. Hkalam Samson telh in a nupi le Peace-talk Creation Group(PCG) chungtel pakhat cu Myitkyina thonginn ah an hren hna, tiah Rev. Dr. Hkalam Samson he naihniam in a um tawn mi nih an chim.
Nizan April 17 ah SAC nih thongtla 3,303 an thlah hna i, cu chung ah cun ramdang mi 98 zong an i tel, ramkhel thongtla belte minung 91 lawng an i tel, taih theih a si. TCP