SAC Ralkap Nih Kahdaih Hnatlaknak An Buar Ruang Ah Kahdohnak A Chuak Ṭhan Tiah Hriamtlai Phu Thum Nih Thanh. Shan ramkulh chaklei ah kahdohnak ngawl ding in China ram Kunming khuapi ah tuah mi kahdaih hnatlaknak cu SAC ralkap nih voi tampi an buar ruang ah Ta’ang National Liberation Army (TNLA) le SAC ralkap kar kahdohnak a chuak ṭhan, tiah chaklei hriamtlai phu unau thum nih January 22 zan ah an thanh.
Shan ramkulh chaklei Mogok peng chung um TNLA ralkap cu nizan January 22 ah SAC ralkap nih vanlawng in bomb an thlak hna. Cun, January 21 ni zong ah Mogok le Mongmit kar ah SAC ralkap le TNLA kar fak ngaiin kahdohnak a chuak ṭhan, tiah chaklei hriamtlai phu unau thum nih an langhter.
SAC ralkap nih kaphnih kahdaih hnatlaknak an buar i kahdohnak an pehzulh nain kahdohnak a zual nakhnga lo lungsau tein kan hngah hna, tiah chaklei hriamtlai phu unau thum nih cun an thanh nain kahdohnak an pehzulhnak kong he pehtlai in SAC ralkap lei nih cun zeibantuk cathanh hmanh an chuah lo.
A luancia January 11 ni ah China tawlrelnak in SAC ralkap le chaklei hriamtlai phu unau thum kar kahdaih hnathlaknak rak ngeih a si nain SAC ralkap nih kaphnih kar hnatlaknak an buar ruang ah kahdoh pehzulh a sinak kong cu chaklei hriamtlai phu thum nih an thanh. Kutkai le Mongmit peng chung ah SAC ralkap le Kachin Independence Army (KIA) kar ah kahdohnak fak ngaiin a chuak ve i Mabein khuapi cu KIA nih an laak cang.
Laukkai Ah Hriamnam A Chia Mi Brigadier General Pathum Cu SAC Nih Thih Dan An Pek Hna, Shan ramkulh chaklei, Laukkai peng ah MNDAA sinah hriamnam a chia mi Brigadier General(BG) Tun Tun Myint, Moe Kyaw Thu le Zaw Myo Win cu SAC biaceihzung nih thih dan an pek hna, tiah Naypyitaw um SAC chung ummi hna nih an chim.January 13 ah Yah Mah Khah uktu Brigadier General Kyaw Kyaw Tun hruainak in SAC biaceihzung cu ni hnih chung ah ser a si i Brigadier General pathum cu an konglam kherhlainak an tuah hna hnu ah thih dan an pek hna.1959 ralkap ukhruainak Upadi section 32(a) ning ah khuapi hngaktu ralkap sakhan, ralhruang le rianṭuannak hmun cu zohchia tuk in zaamtak, asiloah midang kut i va pek ahcun thih dan pek khawh a si.
MNDAA sinah SAC ralkap le an chungkhar minung 4,000 leng he hriamnam a chiatu lakah ṭuanvo ngeitu bik le Laukkai ukhruainak phu ah Chairman Brigadier General Tun Tun Myint, Dah Kah Sah Commander Moe Kyaw Thu, Division 55 Division Commander Zaw Myo Win cu thih dan an pek hna.
Cu pinah BG rank ngei pathum a simi Dah Kah Sah 16 in Division Commander Thaw Zin Oo, Aung Zaw Lin le Aye Min Oo zong thih hlan lo thong thlak ding le Laukkai hmunram um Colonel rank a ngei mi minung paruk zong kum 20 thong thlak dingin bia an ceihpiak hna.