Rezua Khuapi Kahdohnak A Fah Ruang Ah SAC Ralkap Nih Raltuknak Vanlawng An Hman. Chin ramkulh, Matupi peng, Rezua khuapi ralkap sakhan kahdohnak ah SAC ralkap le tualchung hriamtlai phu kar kahdohnak a fah ruang ah ralkap nih raltuknak vanlawng an hman, tiah theih a si. Rezua khuapi chung hrambunh ralkap sakhan cu November 26 ni ah Chin hriamtlai phu CNA, CDF – Zotung le hriamtlai ṭangṭi phu hna nih an rak kah.
Nihin November 28, zanlei suimilam 3:15 ah SAC ralkap nih vanlawng hmang in bomb an thlak ruang ah inn cheukhat zong a rawk. Cun zanlei suimilam 5:00 hrawng ah Rezua myoma palik sakhan ah vanlawng in bomb an thlak ṭhan nain tualchung hriamtlai phu aa hliammi an um lo, tiah theih a si.
“Atu lio cu kahdohnak a fak ngai. SAC ralkap lei nih raltuknak zong an hman nain kanmah ralkap lei in hliampu kan um lo. Inn cheukhat belte a rawkmi an um,” tiah CDF – Zotung in ṭuanvo ngei pakhat Salai Danny nih Zalen ah a chim. SAC ralkap nih Matupi peng chung ah vanglawng in kahdonak a tuah ruang ah November thla chung ah tualchung mi 12 an thi i 3 hliam an tuar. TCP