Rezua sakhan an lak ah ralhrang minung 40 an tlaih hna. Minung 40 lawng hlah, hriamnam meithal le kuanzen bomb tampi lak chap rih a si. An tlaihmi hna lakah kum kum khua upa tar lei phunphai an tam rua, cun chungkhar nupi le fale he a um mi zong an um hna. Ralhrang chungkhar an si ko nain, nu le ngakchia tete zoh ah zaangfak ngai cu an si. Nu nau pua mi khi tha tein zoh ulaw nau puakpuan khi Lai thil si dawh asi. Lai thil a si ahcun, mah nu khi Laimi asi theo lai dah.
Loikaw University Chung In An Tlaih mi Non-CDMers 59 le Chungkhar 27 Cu Karen Ram In An Ṭhawl Hna — Loikaw University ah a cang mi November 13-14 kahdohnak chung ah KNDF nih an chanh mi ralkap kuttang fimnak lei rianṭuantu le chungkhar minung 86 tiah an zapi minung 19 cu CDM a tuah mi an si lo caah Karenni ram caan karlak mipi uknak phu nih ram chung in an ṭawl hna tiah Karenni ram caan karlak mipi uknak phu nih an thanh.
Cathanh chung ah “Ralkap he pehtlaihnak tuah ti lo ding, ralkap zung hna ah rianṭuan ti lo ding le mipi he dirṭi ding” ti mi biakam minthutnak an tuahter hnu hna ah an thlah hna tiah theih a si. Loikaw University sianguk bawi le sianguk bawi chang hna telh in rianṭuantu 5 le an chungkhar hna cu ralkap lei ṭang in CDM an tuah duh lo caah sual an phawt hna hi a si.Cun adang chungkhar 3 hna zong Non-CDM he pehtlai in zohfelnak a tuahtu phu sin ah an kuat hna tiah an langhter.
“Kan Chin ramkulh zong ah Non-CDM pawl hi cu ram a ṭhat ahcun Karenni bantuk in kan ram in ṭhawl ve hna usih law a ṭha hnga, cun rector (sianguk bawi, University sianguk bawi, Township Education Officer (မြို့နယ်မှူး) le ralkap kuttang zung kip rianṭuantu lutlai le rank sang pawl hna hi cu tazacuai chap siseh law, pension zong pek bak hna lo in tuah ve hna usih law a ṭha hnga” tiah Mipi Fimcawnnak lei upa pakhat nih The Chinland Post ah a chim ve.
Laukkai Hmunram Ah SAC Ralkap Le Chungtel Minung 272 Nih Hriamnam An Chiah. Shan ramkulh chaklei, Laukkai Da-Kah-Sah kuttang Khah-Lah-Yah Battalion 125 in ralkap 93, Pyituhsit 27, palik 11 telh in minung 272 nih thantar raangmi thlai in hriamnam chiah i mipi sin ah an i fonh, tiah theih a si.
MNDAA nih pehzulh in kahdohnak an kalpi i nizan November 28 ni ah Konekyan sakhan telh in ralkap sakhan pawl an laak khawh. SAC ralkap cheukhat le an chungkhar pawl le Pyituhsit phu telh in minung 270 leng nih an hriamnam an chiah. November 28 ni tiang MNDAA nih Konekyan hmunram SAC ralkap sakhan 5 le umhmun an khuarnak pawl cu an laak dih, tiah theih a si.
MNDAA nih tluang ngaiin kahdohnak an kalpi cuahmah ruang ah Khah-Lah-Yah Battalion 125 cu an battalion ningpi in hriamnam kan chiah cang ti langhternak caah thantar raangmi an thlai hnu ah ralbawi pakhat le ralkap pakhat cu MNDAA he tonnak an ngei i hriamnam chia in mipi sin an i fonh duhnak kong an chimh hna. MNDAA nih hliampu cheukhat le an chungkhar hna cu an tuamhlawm hna, cu hnu ah kaphnih kar hnatlaknak an ngeih bantuk tein ralbawi pa nih a naule cu an dihlak in a auh hna i MNDAA sin ah hriamnam tling he an i fonh.
Cu ralbawipa nih cun SAC ralkap Sah-Khah-Yah 16 ralbawi pakhat nih ralkap 100 leng cu November 27 ni ah a zaampi dih hna, tiah a chim.Hriamnam he mipi sin aa fonhmi hna cu; Pyituhsit 27, Khah-Lah-Yah Battalion 125 in 93, Sah-Kah-Khah 16 in 36, Sah-Kah-Khah 12 in 14, an chungkhar minung 86, kahdohnak kong ah ruahnak petu 5 le palik 11 hna an si i an dihlak ah minung 272 an si. Cu pin ah hmunram thianhfelnak an tuah lioah SAC ralkap an tlaih chapmi pawl zong an um, tiah theih a si.
Lailenpi Khuapi In Mizoram Ah A Zaam Mi SAC Ralkap 30 Cu Myanmar Ah Kuat An Si. Chin ralkap nih Lailenpi SAC sakhan an rak kah lio ah Mizoram lei i a zaam mi SAC ralkap 30 cu nihin zing suimilam 9:30 hrawng ah Siaha District, Tuipang khua in Moreh lei ah kalpi an si, tiah theih a si. Mizoram ah aa dor mi SAC ralkap hna hi November 28, zinglei suimilam 7 hrawng ah Mizoram chung an lut i, Siaha district Laki khua um Assam rifles nih an rak don hna.
SAC ralkap pawl hi Indian ralkap helicopter nih tuzing suimilam 9:30 le 10:30 ah vawihnih thiar in a thiar hna i, Moreh lei ah a kalpi hna. Moreh hin Tamu lei ah kalpi an si lai tiah ruah a si. Chin ramkulh, Matupi peng chung i a um mi Lailenpi khua cu Chin ralkap phufonh nih an rak kah i, November 24, zinglei ah an rak laak. Hi lio ah hin Chin ralkap nih meithal kuan zeimawzat zong an rak laak nain SAC ralkap 30 hi Mizoram lei ah an rak zaam manh.
A luancia November 13 zong ah Rihkhuadar SAC sakhan cu Chin ralkap ṭangṭi phu nih an rak luhhnawh i, SAC lei nih an tei hna lo ti an hngalh hnu ah ralkap 43 cu Mizoram, Zokhuathar Police station ah an rak zaam i, Myanmar lei ah kuat an rak si cang. Cu bantuk ṭhiam in Tibual sakhan in a zaam mi SAC ralkap 29 zong Myanmar lei ah kuat an si i, thlakhat chung ah India ram in SAC ralkap 100 leng cu Myanmar lei ah kuat an si.The Chin Post