Kennedy Tlang In A Zaammi SAC Ralkap Pali Laak Ah Pahnih Cu Hriamnam He An Tlaih Ṭhan Hna. Chin ramkulh, Tedim peng chung Kennedy tlang sakhan kahdoh lioah a zaammi SAC ralkap pali lak ah pahnih cu November 26 ni ah Kalay peng ah an tlaih ṭhan hna, tiah theih a si. A luancia November 21 ah Kennedy tlang cu PDF Zoland nih an rak laak i SAC ralkap 11 an rak tlaih hna. Kahdoh lioah minung 4 cu an rak zaam i, cu chung ah minung 2 cu hriamnam he Kalay peng chaklei ah tualchung hriamtlai phu nih an tlaih ṭhan hna, tiah theih a si.
Kennedy tlang in a zaammi minung pali lak ah pakhat cu Kalay peng khua a phanh hlan ah a tha a dih i lampi ah a thi, tiah theih a si. “Kalay chaklei tlanghrawn ah minung pahnih cu hriamnam he kan tlaih hna, minung pakhat tu cu Pyusawhti pawl sin ah a luh kan zumh. Kan tlaih khawh ṭhanmi hna pahnih cu pengkomh hruaitu sin ah kan ap cang hna,” tiah tualchung hriamtlai phu in chungtel pakhat nih a chim.
“A zaammi minung pakhat a hnu bik kan hmuhnak cu Pyinkhonkyi khua pawng ah a si i, changreu zong a kan hal i kan pek. Kan zumh ning ah hriamngan an kahnak lei hoih in a zaam ṭheo lai. Pyinkonkyi khua tlanglei cu Pyusawhti khua deuh lawngte a si bantukin anmah sin ah a um ko lai. Meithal pakhat aa put caah a kawlmi zong ralring tein um i zuam u,” tiah mithmutu tualchung mi pakhat nih a chim.