Tonzang Peng, Darkhai Khua Pawng I Kahdohnak Ah CNA Nih ZRA Ralkap Pakhat An Tlaih- Chinram chaklei, Tonzang peng, Darkhai khua pawng i kahdohnak ah Chin National Army(CNA) nih ZRA ralkap pakhat cu a hriamnam he an tlaih, tiah theih a si.
“Nizan April 3, zinglei suimilam 6:00 hrawng ah khual a tlawng mi CNA ralkap cu Zomi Revolutionary Army(ZRA) nih lampi ah rak bawh in an kah hna hnu ah kaphnih kar kahdohnak a chuak i CNA lei in minung pahnih hliam fak tuk lo an tuar. CNA nih motorcycle 3 an chuh khawh hna i ZRA lei nih motorcycle 4 an chuh ve hna, ZRA ralkap pakhat tu cu CNA nih a hriamnam he an tlaih,” tiah CNA he naihniam in a um mi pakhat nih The Chin Post ah a chim.
Hi kong he pehtlai in CNA lei nih thawngthanhnak an tuah mi a um rih lo. “Media cheukhat nih Darkhai khua pawng kahdohnak ah CNA ralkap 6 an thi tiin an thanh mi cu thawng dik lo a si. Kahdohnak ah kaphnih in a thi mi an um lo i CNA lei tu in minung pahnih hliam fak tuk lo an tuar,” tiah CNA he naihniam in a um mi pakhat nih cun a chim.
Naypyidaw General Headquaters Le Van Ralkap Umnak Cu Drone In An Kahdoh Kong NUG Nih Thanh- SAC nih hram an bunhnak Naypyidaw General Headquaters le van ralkap pawl an umnak hmun cu nihin April 4 zinglei ah tualchung hriamtlai ṭangṭi phu nih Drone in an kah kong NUG Defence Ministry nih an thanh.
Naypyidaw SAC General Headquaters cu Kloud Drone Company le PDF ṭangṭi phu nih Drone 16 in an kah i van ralkap umnak hmun cu Lethal Props Company le PDF ṭangṭi phu nih Drone 13 in an kah, tiah NUG Defence Ministry nih an thanh.
Hi kong he pehtlai in SAC lei nih zeibantuk hmanh an thanh mi a um rih lo i General Heaquaters le SAC van ralkap an umnak hmun pawng ah a um mi tualchung mi nih cun, “Puahkeh thawng zeihmanh kan thei lo i boruak a dai ngai ko, SAC ralkap zong nih humhimnak laak tibantuk an tuah kan hmu lo,” tiah an chim ve.
A liamcia 2023 zong ah Naypyidaw SAC hmunram Pyinmana peng le Lewe peng chung SAC ralkap sakhan le van ralkap umnak hmun cu tualchung hriamtlai phu nih an rak kah bal cang. TCP