THLARAU LAKSAWNG AN DONGH CANG NING ZOHFIANNAK
1. FIMNAK BIA CHIMTHIAMNAK- Fimnak biachim thiamnak hi phun thum in hmuh khawh asi. Cuhna cu: (a) I chuahpimi fimnak (b) Nulepa, pawngkam le siangin in cawnmi fimnak (3) Thiang Thlarau nih fimnak laksawng peknak hmangin an si. Asinain, Thiang Thlarau nih fimnak laksawng a pek i a fimmi cu nan theihmi an um lai ti lai lo. Zultu hna chan lio ah a pekmi asi.
2. HNGALHNAK BIACHIM THIAMNAK- Zultu hna chan lio ah cun hngalhnak hi Pathian nih laksawng ah a rak pekmi an um. Cucaah, hmailei i a ra dingmi kong kha an hngalh caah hmailei i a ra dingmi kha Bible ah an kan țial piak khawh. Tuchan zumtu nihcun hmailei a ra dingmi kong hngalhnak kha Pathian nih a kan pe ti lo i kan hngal ti lo. Pathian nih hngalhnak a pekmi hna chimmi chungin dah ti locun, Hmailei kong cu zawndamh lawngin kan chim khawh cang.
3. ZUMHNAK- Zumhnak hi Jesuh a zum cangmi cheukhat hna kha Thlarau nih laksawng ah a pekmi zumhnak asi. Zumtu cheukhat kha a rak pekmi laksawng asi nain, atu ah cun thlacamnak, Baibal tampi relnak, le Thlarau in khahnak lawnglawng in zumhnak țhawng cu ngeih khawh asi. Laksawng in mi cheukhat a pe ti lo.
4. ZAWT-DAMTERNAK- Pathian nih aho thlacamnak poh in zawtnak a dam ter khawh. Asinain, minung pahnih/khat sinah laksawng in a pek i mizaw a damh thluahmahmi nan theihmi an um ka zum lo. Pathian sinin damnak hmuh na duh ahcun, aho thlacamnak poh in Pathian nih an damh khawh.
5. KHUARHUAHHAR TUAHNAK- Pathian nih aho kan cung poh ah khuaruahharnak thil a tuah. Ni fatin a tuah. Zultu hna chan lio ah laksawng ah a pek hna i an duh tik poh ah an rak tuah khawh. Atu ah cun laksawng in a kan pe ti lo. Kanmah nawl in tuah khawhnak nawl a kan pe ti lo. Kan thlacamnak le kan herhmi zulh in amah Pathian lawng nih a tuah cang.
6. BIAPHUANNAK- Hmailei a ra laimi kong le Pathian nih zumtu hna tuah hna seh ti a kan duhmi kong cauk (Baibal) tling kha zultu hna chan ah an rak ngeih rih lo caah, Pathian nih bia a rak chimh hna i cucu zaapi sinah an phuan. A phuangtu dingmi kha Pathian nih a rak thim hna i cucu profet ti asi. Atu ahcun Pathian nih Khrihfabu nih a zulh dingmi, a zumh dingmi le a cawnpiak dingmi kha Baibal ah tlingtein a țial ter cang hna caah, Baibal lam hruaitu kan ngeih hnu cun aho hmanh pumpak in bia a chimhmi an um ti lo caah biaphuan zong a dong cikcek. Pathiam aw na theih duh ahcun Baibal kha na rel ding asi ko.
7. THLARAU LAKSAWNG A DIK LE DIK LO THLEIDANKHAWHNAK-Tuchan Khrihfa bantukin lik in holhtheihlo holh le lih biaphuan hna an hman nakhnga lo, pakhat nih Thlarau laksawng a tincomi kha adik le dik lo thleidan khawhnak Thlarau laksawng a pekmi kha zultu hna chan ah an rak um. Atu ah cun hi laksawng hi aho hmanh nih an tinco tilo caah biatak le lih laksawng i fiang loin Khrihfa kan um hna. Lih le biatak kan thleidan khawhnak cu Baibal hmang lawngin asi cang, thleidan khawhnak laksawng kan a kan pe ti lo.
8. HOLH PHUNPHUN IN HOLH KHAWHNAK-Jesuh nih a zultu hna cu vawlei pumpi ah a thawngțhabia phuan a fial hna. Asinain, cataang sang le holh phunphun thiammi an um lo. Cucaah, holh phunphun in chimrel khawhnak kha a rak pek hna. Khuaruahhar in a bawmh hna kan ti lai cu. Atu ah cun, miphun dang holh cu cawn lo ah cun thiam khawh asi ti lo. Cawn hmanh ah kan thiam kho ngaingai lo.
9. HOLH PHUN DANG LEHKHAWHNAK- Thlarau nih holh phunphun in holh khawhnak kha a rak pek hna caah, holh phun dang leh khawhnak zong cu laksawng ah a pekmi an rak um ve. Holh khawhnak lawng pek i a let khotu pek chih lo hi Pathian kal phung asi lo. Atu ah cun, holhleh thiam ding ah cun kan leh dingmi holh le an holh in na leh lai dingmi holh kha a pahnih in thiam taktak ding in na cawn lawngah na leh khawh lai. Thliang Thlarau bawmhnak in Russia holh ka leh khawh a timi vawlei cungah a um ti lo.
10. APOSTLE (Efe. 4:11) Apostle sinak dingah cun (a) Jesuh a thawhțhan hnu a mit in a hmumi (Lam. 1:22) (b) Jesuh nih pumpak in a auhmi (Rm. 1:1), le Pathian nih khuaruaharnak tuah khawhnak laksawng a pekmi si a herh (2 Kor. 12:12). Jesuh cu vancung ah a kai cang i pumpak in ton khawh a si ti lo caah vawlei cungah apostle an um kho ti lo. Cucaah, hi laksawng zonghi a dong diam.
11. PROPHET, PASTOR, EVANGELIST, CAWNPIAKTU (Efe. 4: 11) Cawnnak hmun țha a rak um lo caah zultu hna chan lio ahcun pastor, evangelist le cawnpiaktu hi Thlarau nih laksawng in a pekmi hna nih an rak țuan. Atu ah cun, cawnnak hmunhma țhami a tampi cang i Pathian rian cu pastor rian asi ah, evangelist rian asi ah, Baibal cawnpiak rian asi ah, țuan a zuammi poh nih an țuan cang. Khrih fialmi a el lomi poh nih a rian an țuan dih. Hihi cu zaapi mithmuh asi ko, el ding a um lo. Holhtheihlo cu Greek Bible, English Bible 99% le kanmah he neihniambik Kawl Baibal ah holtheihlo timi biafang cu a um lo caah a tial awk a um lo. Asi lomi nan chimmi chung hin ai el ding men khi kan si.