Unbroken Generation Hriamtlai Phu Cu CDF Senthang Sin Ah An I Fonh- Chinram, Senthang peng hrambunh CDF Senthang sin ah Gangaw peng hrambunh Unbroken Generation phu cu an i fonh, tiah theih a si.January 14 ah Unbroken Generation hriamtlai phu cu CDF Senthang sin ah an i fonhnak le Brigade 2 in an cawlcangh lainak kong cu CDF Senthang nih phungning thanhnak an tuah.
“Unbroken Generation hriamtlai phu hi Gangaw peng Daidin hmunram lei ah a cawlcaang mi an si i kan sin ah a rak lut mi hi 40-50 kar hrawng an si lai. A dang Unbroken Generation chungtel kan sin ah a rak lut rih lo i a taang mi hna zong an tampi rih,” tiah CDF Senthang chimphuannak nawlngeitu pakhat nih The Chin Post ah a chim.
2023 December 15-20 karah Myitthar dam sakhan kan rak laak lio thawk in Unbroken Generation hriamtlai phu he bia kan rak i ruah pah cang. An nih hi Gangaw peng ah a cawlcaang mi an si i tam deuh cu Laimi lawngte an si. January 14 ah kan sin ah phungning tein an rak i fonh, Brigade 2 in kan chiah hna i kahdohnak zong ah an i tel cang lai, tiah a chim chap. CDF Senthang cu Chinland Council he zong hmunkhat ah rianṭuanṭi dingin timhtuahnak an ngeihnak kong CDF Senthang chimphuannak nawlngeitu pakhat nih cun The Chin Post ah a chim.