Rezua hrambunh SAC ralkap pahnih CDF-Zotung sinah hriamnam he an i ap, Matupi peng, Rezua khua hrambunh SAC ralkap pahnih cu nizan November 26 ah hriamnam kuanzen he CDF-Zotung sin ah an rak i ap tiah CDF-Zotung nih nihin ah a thanh. A rak i ap mi pahnih cu Tin Naing Htwe le Van Lal Mawi an si tiah theih a si i, MA-1 meithal zun 1, zenthong 380, Inaga bomb 5, kut cheh bomb 3, mine 1, kuan kham lukhuh 1 le kuan kham angki zun khat an rak i ken tiah an langhter.
Hriamnam he a rak i ap mi Tin Naing Htwe le Van Lal Mawi cu CDF-Zotung nih laksawng tangka Kyats sing 100 an pek hna hnu ah, himnak hmun ah an thlah hna tiah CDF-Zotung nih a thanh. Atu kar hrawng cu Chin ralkap hna nih SAC ralhraang camp pawl pehtlai nawn in an hun laak hna caah, hriamnam he rammi ralkap sin ah a hung zaam mi SAC ralkap le palek an um pah lengmang.
November 22 ah Rezua hrambunh SAC ralkap lance coporal pakhat cu CDF-Zotung sin ah a rak i ap i, November 26 ah Matupi Palek Sakhan in palek pakhat le a chungkhar zong CDF-Matupi (B2) sin ah hriamnam he an rak i ap. THP