Bungzung SAC Ralkap Sakhan Chin Hriamtlai Phu Nih An Laak Cang. Bungzung SAC ralkap sakhan cu Chin hriamtlai phu nih zan khat le chun hlan an kah hnu ah an laak khawh cang, tiah theih a si. Bungzung sakhan laak kahdohnak ah SAC ralkap lei in a thimi an tam i hliamhma pumi zong an tam. Cu pinah ralbawi telh in SAC ralkap kan tlaihmi hna zong an um i kan tlaihmi hna a zat tu cu a fiang rih lo. Bungzung sakhan cu nihin December 18 chun suimilam 12:00 tluk ah kan laak, tiah ralhmai a kalmi Chin ralkap pakhat nih The Chin Post ah a chim.
Kanmah lei in CDF ralkap Salai Van Ṭha Ceu le Salai Van Dam nih an nunnak an pek i ralkap 8 hrawng hliamhma kan pu. Bungzung sakhan bawmtu SAC ralkap vanlawng nih zinglei ah a kan kah i nihin chun suimilam 12:00 ahcun a kir ṭhan cang, tiah a chim chap. Bungzung SAC ralkap sakhan cu Chin hriamtlai phu nih kah dingin an kulhnak a sau ngai cang i sakhan ah a ummi ralbawi pakhat hi Laimi a si.
Chin hriamtlai phu nih hriamnam chia dingin an chimh ko hna nain hriamnam an chiah duh lo caah an kah i sakhan an laak hi a si. SAC ralkap tlaihmi hna le hriamnam zen-kuan laakmi zong a rauh hlan ah nawlngeitu nih an langhter te ko lai, tiah Chin ralkap he naihniam in a ummi pakhat nih The Chin Post ah a chim.