March 6 ah Kalay hmunram vengtu CDF KKG chung in pasaltha Suan Sian Khai cu ralhrang bomb thlak mi ruang ah nunnak a liam tiah theih a si. Vaphai khua duty an umnak hmun ah ralhrang nih bomb an thlak i minung 2 hliam an tuar i salai Suan Sian Khai bel nunnak a liam tiah theih a si. Kan theih bantuk in tulio hi Kalay hmunram ah kahdohnak a fak ngaingai lio caan a si. Thlacamnak in philh hna hlah u sih.
Chin Hriamtlai Phu Unau Sin Ah CDF-Kanpetlet An I Fonh=Chin Defense Force-Kanpetlet cu nihin March 6 thawk in Chin hriamtlai phu unau 4 sin ah an i fonh i, an i fonhnak kong phungning tein an thanh. Chin hriamtlai phu unau sin ah i fonh ding kong he pehtlai in voi tampi tonbiaruahnak ngeih a si hnu ah Chin hriamtlai phu unau nih an kalpi mi tlukruannak le mahte khuakhan lairelnak phunglam he aa tlak ning in Chin Defense Force-Kanpetlet cu nihin March 6 thawk in chungtel kan si cang, tiah an cathanh chuah mi ah an langhter.
Chin hriamtlai phu unau cu Chinland Council ah aa tel lo mi ZFU/PDF Zoland, CNO/CNDF le CNC/CDF-Mindat nih a liamcia 2023 December 30 ah an rak dirh mi a si. Tukum 2024 January 30 ni ah MTC/MDF cu chungtel ah an rak lut ve, nihin March 6 ah CDF-Kanpetlet zong an i fonh ve i an zate ah phu 5 an si. TCP